Գանձապետական միասնական հաշվարկներով մեծ ֆինանսական ռեսուրսներ չեն շրջանառվում, դուրս են մնում թափանցիկ վերահսկողությունից. Լևոն Յոլյան

13:00 • 26.06.17

2016 թ-ի պետական բյուջեի կատարողականի քննարկմանը ՀՀ Վերահսկիչ պալատի նախագահ Լևոն Յոլյանը մեկ խնդրի վրա ուշադրություն հրավիրեց, որն, ըստ նրա, սկզբունքային է և մոտակա ժամանակահատվածում լուծման կարիք ունի:

Ըստ նրա՝ 2008թ-ին սուր էր հարցը դրվում, որ վարկային, դրամաշնորհային միջոցները պետք է սպասարկվեն գանձապետական համակարգի միջոցով: Յոլյանը հիշեցրեց, թե այն ժամանակ միջոցներն առևտրային բանկերով էր շրջանառվում և նշեց, թե դոնոր կազմակերպությունների հետ միջոցներն ուղղվել են գանձապետական միասնական հաշվին, դրանով էլ դուրս բերվել առևտրային բանկերին:

ՎՊ նախագահը շարունակեց, թե 2016-ին Կառավարությունը ծրագրային օպտիմալացման գործընթաց սկսեց և դրա պատճառով «մեծ ֆինանսական ռեսուրսներ գանձապետական հաշվարկներով չեն շրջանառվում: «Պարզ տրամաբանություն է, որ եթե շրջանառվեն, դրանք շատ ավելի թափանցիկ ու վերահսկելի և, բնականաբար, մեր եզրակացությունն էլ շատ ավելի արդյունավետ կլինի»,-ասաց նա և նշեց, թե Կառավարությունը պետք է այդ հարցին ուշադրություն դարձնի:  

«Հիմնական խնդիր դրել էինք, որ պետական մասնակցությամբ բաժնետիրական ընկերությունները՝ հիմնադրամները, ՊՈԱԿ-ներն իրենց ֆինանսական ռեսուրսները նույնպես պետք է շրջանառեն գանձապետական միասնական հաշվով: Ցանկություն կա, բայց մինչև այս պահը սայլը տեղից դեռ չի շարժվել: Հուսով եմ՝ մոտակա ժամկետում այդ հարցերին էլ լուծում կտրվի»,- ասաց նա:

Լևոն Յոլյանի խոսքով՝ դրանով իրենք կլուծեն խնդիրների մի մասը և դեռ գանձապետարանին կլիազորեն նախնական հսկողություն այդ գումարների նկատմամբ:  

«Մեր եզրակացությունը շատ դեպքերում վիճակագրական բնույթ է կրում, բայց հիմա Սահմանադրությունը որակական նոր պահանջ է դրել, 2018-ից երգակցությունը պետք է հիմնված լինի տարվա ընթացում իրականացված աուդիտի հիման վրա և մենք շատ հարցեր կներկայացնենք: Հիմա համապատասխան աշխատանքներ են տարվում, որ լինեն խիստ արդյունավետ»,-ասաց նա: