Ագրամունտը դարձավ պատճառը, որ ԵԽԽՎ-ում կոռուպցիոն սկանդալների մեջ ներքաշված պաշտոնյաների համար հետկանչի մեխանիզմ ամրագրվի․Ն․ Զոհրաբյան

21:51 • 27.06.17

Բոլոր քաղաքական խմբերի, բոլոր պատգամավորների հիմնական թիրախը ԵԽԽՎ նախագահ Պեդրո Ագրամունտն էր, իսկ Մարի Պասկեի զեկույցը վերաբերում էր ընդհանրապես ԵԽԽՎ-ի կանոնադրության փոփոխությանը, որը ենթադրում է ստեղծել հնարավորություն` սկսելու  վստահությունը կորցրած ԵԽԽՎ պաշտոնյայի հեռացման գործընթացը․ Tert.am-ի հետ զրույցում այսօր ԵԽԽՎ-ում կատարվողի մասին պատմեց ԱԺ Եվրոպական ինտեգրացիայի հանձնաժողովի նախագահ, ԵԽԽՎ պատվիրակության անդամ Նաիրա Զոհրաբյանը:

«Նախադեպը Ագրամունտն էր, բայց Ագրամունտը դարձավ պատճառը, որ այսուհետ ԵԽԽՎ վստահությունը կորցրած, կոռուպցիոն տարբեր սկանդալների մեջ ներքաշված, տարբեր տոտալիտար ղեկավարների կրունկի տակ ճզմված պաշտոնյաների համար հետկանչի մեխանիզմ ամրագրվի»,- ասաց նա:

Հիշեցնենք, որ Եվրոպայի խորհրդի խորհրդարանական վեհաժողովը՝ ԵԽԽՎ-ն, երեքշաբթի ձայների մեծամասնությամբ ընդունել է բանաձև, որը ենթադրում է կանոնակարգում փոփոխություններ, որոնցով թույլ է տալիս սկսել վեհաժողովի ներկայիս ղեկավար Պեդրո Ագրամունտի պաշտոնից հեռացման գործընթացը: Կողմ է քվեարկել 154 խորհրդարանական, դեմ՝ 30, ձեռնպահ՝ 13: Ընդհանուր առմամբ, քվեարկությանը մասնակցել է 197 խորհրդարանական:

Նաիրա Զոհրաբյանի խոսքով՝ այս  ընթացքում ԵԽԽՎ-ում քննարկումները լակմուսի թուղթ դարձան՝ բացահայտելու համար բոլոր այն «հաճախորդներին», որոնցից շատերն այս տարիների ընթացքում թաքնված լոբբինգ էին իրականացրել Ադրբեջանի համար:

«Այդ  մարդիկ ելույթ ունեցան և իրենց մարմնի բոլոր մասերով սկսեցին պաշտպանել Ագրամունտին, և նրանց գլխավորում էր Ադրբեջանի պատվիրակության ղեկավարը, ով փորձեց վերջին ջանքերը գործադրել այդ զեկույցը տապալելու համար»,- ասաց նա:

Նաիրա Զոհրաբյանը նկատեց, որ ԵԽԽՎ-ում  ամենաքննարկվող հարցն է՝ ինչո՞ւ Ագրամունտն ընտրեց այդ գործընթացը և չտվեց հրաժարական: «Ըստ իս՝ պատասխանը մեկն է՝ Ագրամունտն այլևս ոչինչ չի որոշում, և իրեն կերակրող, իրեն սնող երկրներն ուղղակի ստիպեցին նրան, որ մինչև վերջ նա անցնի այդ գործընթացը՝ մինչև վերջ հավատալով, որ հնարավոր է՝ ինչ-որ մի պահի ինչ-որ բան փոխել»,- ասաց նա:

ԱԺ պատգամավորի խոսքով՝ այն, ինչ տեղի ունեցավ այսօր առավոտյան, ԵԽԽՎ-ի առողջացման գործընթացի սկիզբն է: «Արդեն Ադրբեջանի բազմաթիվ հաճախորդներ, կանխազգալով իրենց գլխին կախված դամոկլյան սուրը, իրենք են արդեն սկսվում տարբեր պաշտոններից հրաժարականներ տալ»,- ասաց նա:

Նաիրա Զոհրաբյանը նշեց, որ ինքն անձամբ ադրբեջանական հասարակական կազմակերպություններից լսել է, որ Պեդրո Ագրամունտի վարձած փաստաբանները, որոնք պետք է օգնեին նրան այս գործընթացում, վարձատրվում են ադրբեջանական պատվիրակության անդամ Էլհամ Սուլեյմանովը:

«Բոլոր երկրների դեպքում ընդունված է Ազգային ժողովի նախագահի անվստահության գործընթաց սկսելու գործընթաց: Ինչո՞ւ պետք է ԵԽԽՎ-ի դեպքում այդ գործընթացը չլիներ: Այո, երբ վաթսունից ավելի տարի առաջ ստեղծվում էր այդ կառույցը, այդ կառույցի հիմնադիրների մտքով անգամ չէր կարող անցնել, որ մի օր այս կառույցը կարող էր կառավարել շարքային ժուլիկը և շարքային կոռուպցիոները: Ուստի, այո, այսօր առաջացավ կանոնադրության մեջ հետկանչի մեխանիզմն ամրագրելու ցանկությունը: Սա պատիժ չէ, սա ժողովրդավարական մեխանիզմ է, ըստ որի, եթե կառույցի վստահությանն արժանացած անձը չարաշահում է այդ վստահությունը, նա պետք է հեռանա, իսկ  եթե նա չի ցանկանում հեռանալ, ինչպես չի ցանկանում Ագրամունտը կամ իրեն թույլ չեն տալիս, կգործի արդեն կանոնակարգի հստակ հետկանչի դրույթը»,- ասաց նա: