Չգիտեմ՝ մանր կամ խոշոր ձուկ ասելով ինչ նկատի ունեք, եթե անուններ գիտեք, ասեք՝ կկալանավորվեն. ՊԵԿ նախագահը՝ լրագրողներին

12:18 • 27.06.17

Զուտ կառուցվածքային փոփոխության արդյունքում ՊԵԿ-ում շուրջ 483 հաստիք կրճատվել է։ Այս մասին ԱԺ-ում լրագրողների հետ զրույցում նշեց Պետական եկամուտների կոմիտեի նախագահ Վարդան Հարությունյանը։

Անդրադառնալով լրագրողների դիտարկմանը, թե արդյո՞ք սա նշանակում է, որ ՊԵԿ-ի աշխատակազմը ուռճացված է եղել Վարդան Հարությունյանը ասաց, որ տարիների ընթացքում ՊԵԿ-ի ՏՏ համակարգը վերազինվել է, նոր տեխնոլոգիաների դարաշրջանում բնական է, որ մարդկային գործոնի առկայությունն ավելի պակասում է։

ՊԵԿ նախագահը նաև չբացառեց, որ կրճատումների հիմքում կարող են նաև սուբյեկտիվ դրսևորումներ լինել։

«Մեկ ամսվա մեջ այս ամբողջ աշխատանքներն իրականացնելն ու ավարտին հասցնելը, իհարկե, դժվար է եղել: Բայց այն աշխատակիցները, որոնք բարեխիղճ աշխատել են և այս ընթացքում միգուցե և դուրս են մնացել համակարգից, ամեն ամիս փոփոխություններ լինում են, և նրանք մեր տեսադաշտից դուրս չեն մնա»,– հավելեց նա: 

Վարդան Հարությունյանն անդրադարձավ նաև ՊԵԿ մի շարք աշխատակիցների ձերբակալմանը՝ նշելով, որ դա իրենց որդեգրած կոռուպցիայի դեմ պայքարի շրջանակում է, և լրագրությունները չարաշահողը պետք է պատժվի։

Լրագրողները Վարդան Հարությունյանին հիշեցրին, որ տեսակետներ կան, թե «մանր ձկներն» են պատասխանատվության ենթարկվում, իսկ խոշոր կոռուպցիոներները չեն պատժվում։ «Ես չգիտեմ՝ մանր ձուկ, խոշոր ձուկ ասելով՝ ինչ նկատի ունեք։ Համենայնդեպս, կալանավորվում են, եթե ունեք ինֆորմացիա, խնդրում եմ ներկայացրեք, և ձեր նշած մարդիկ նույնպես կկալանավորվեն»,-ասաց նա։