Վերջին 3 տարվա մեջ առաջին անգամ Մոսուլում Ռամադանի ավարտը նշվել է առանց ԻՊ-ի ներկայության (լուսանկարներ)
Միլիոնավոր մուսուլմաններ աշխարհի տարբեր անկյուններում նշել են սրբազան համարվող Ռամադան ամսվա ավարտը, գրում է The Daily Mail-ը՝ նկատելով, որ տոնն առանձնահատուկ նշանակություն է ունեցել հատկապես Մոսուլի բնակիչների համար, քանի որ նրանք անցած 3 տարվա մեջ առաջին անգամ տոնը նշել են «Իսլամական պետություն» ահաբեկչական խմբավորման տիրապետությունից ազատված:
Պարբերականը մանրամասնում է, որ Իրաքի կառավարական ուժերի շնորհիվ իսլամիստների կարևորագույն հենակետերից մեկը համարվող Մոսուլի մեծ մասն ազատագրվել է իսլամիստներից:
Քաղաքի արևելյան հատվածում մեծահասակներն ու երեխաները հավաքվել են հրապարակներում, մինչդեռ ԻՊ-ի ներկայության տարիներին Ռամադանի ավարտի կապակցությամբ տոնակատարություններն արգելված էին, փոխարենը՝ կարելի էր միայն աղոթել:
Հայտնի է, որ Մոսուլի արևմտյան հատվածում գտնվող Հին քաղաքը դեռևս շարունակում է մնալ իսլամիստների վերահսկողության տակ: Քաղաքի այդ հատվածում կա մոտ 350 իսլամիստ, ինչպես նաև 50.000-ից ավելի բնակիչ:
Հավելենք, որ մուսուլմանների համար սրբազան Ռամադան ամսվա ավարտը նշվում է վաղ առավոտյան աղոթքներով, ընտանեկան հավաքույթներով ու խնջույքներով:

















