Վարձու մարդասպան Զաուր Դադաևը մեղավոր է ճանաչվել ռուս ընդդիմադիր գործիչ Նեմցովի սպանության համար
Մոսկվայի շրջանային ռազմական դատարանի ատենակալների կոլեգիան մեղավոր է ճանաչել ընդդիմադիր քաղաքական գործիչ Բորիս Նեմցովի սպանության գործով բոլոր հինգ ամբաստանյալներին: Այդ մասին հայտնում է «Интерфакс» գործակալությունը:
Ատենակալները վճռել են, որ ապացուցված է, որ Դադաևը փետրվարի 27-ին՝ ժամը 23:31-ին, իր մոտ եղած ատրճանակից Նեմցովի ուղղությամբ արձակել է առնվազն վեց կրակոց՝ նրան հասցնելով կյանքի հետ ոչ համատեղելի մարմնական վնասվածքներ, որոնցից քաղաքական գործիչը տեղում մահացել է:
Ատենակալների դատավճռի համաձայն՝ վարձու մարդասպան Զաուր Դադաևը, ինչպես նաև Անզոր Գուբաշևը Գրոզնիում ձերբակալության ընթացքում մահացած Բեսլան Շավանովի հետ անմիջական մասնակցություն են ունեցել 2015 թվականի փետրվարի 27-ին Մոսկվայի կենտրոնում սպանության իրականացմանը՝ գաղտնի հետևելով նրան:
Իրենց հերթին, Շադիդ Գուբաշևը, Թեմիրլան Էսկերխանովը և Խամզատ Բախաևը մասնակցել են սպանության նախապատրաստմանը: Գուբաշևը հանցագործության անմիջական իրականացնողների հետ նույնպես հետևել է Նեմցովին, իսկ Էսկերխանովը և Բախաևը դա արել են հեռակա կարգով: Սպանությունից հետո բոլոր երեքն օգնել են սպանության անմիջական իրականացնողներին թաքնվել իրավապահ մարմիններից, գտել են ատենակալները:
Նշվում է, որ շարունակվում է հետաքննությունը սպանության ենթադրյալ պատվիրատու և կազմակերպիչ Ռուսլան Մուխուդինովի նկատմամբ, ով 2015 թվականի նոյեմբերից միջազգային հետախուզման մեջ է:










