Վենեսուելայում գտել են ուղղաթիռը, որով հարձակում էր իրականացվել դատարանի ու ՆԳՆ շենքերի վրա

09:44 • 29.06.17

Վենեսուելայում հայտնաբերել են ուղղաթիռը, որից նախօրեին հարձակում էր իրականացվել մայրաքաղաք Կարակասի վարչական շինությունների՝ Գերագույն դատարանի ու Ներքին գործերի նախարարության շենքերի  վրա:

Ինչպես նշում է tvzvezda.ru-ն, իշխանությունների փոխանցմամբ՝ ուղղաթիռը պատկանել է Վենեսուելայի ոստիկանության Գիտական, քրեական հետաքննությունների բաժնին:

Սակայն ոլորտի փորձագետների կարծիքով՝ ուղղաթիռի հարձակման միջադեպը կարող էր բեմադրված լինել՝ երկրի կառավարության համար սպառնալիքի պատրանք ստեղծելու համար:

Ինչպես ավելի վաղ հայտնել էր Tert.am-ը, ոստիկանական ուղղաթիռից 15 կրակոց է արձակվել Ներքին գործերի նախարարության շենքի ուղղությամբ, որտեղ տասնյակ մարդիկ մասնակցում էին միջոցառման, և չորս նռնակ էլ նետվել է դատարանի վրա:

Հաղորդվում է, որ հարձակման հետևանքով վիրավորներ չկան:

Երկրի նախագահ Նիկոլաս Մադուրոն այն անվանել է ահաբեկչական հարձակում, որի նպատակը հեղաշրջում իրականացնելն էր, և խոստացել է գտնել պատասխանատու անձանց:

Վենեսուելայի կառավարությունը տարածած հաղորդագրությունում հայտնել էր, որ ուղղաթիռն առևանգել է ոստիկանական օդաչու Օսկար Պերեզը, ով իրեն ապստամբ է հռչակել Մադուրոյի դեմ:

Սոցիալական մեդիաներով տարածված լուսանկարներում երևում է, թե ինչպես է Պերեզը դրոշ թափ տալիս ուղղաթիռից, որի վրա գրված է «Ազատություն» և «350»: Թիվը վերաբերում է Սահմանադրության հոդվածին, որը թույլ է տալիս մարդկանց ընդդիմանալ ոչ ժողովրդավարական իշխանությանը: