Ֆրանսիայում մզկիթի մոտ հավաքված հավատացյալներին վրաերթի ենթարկելու փորձ կատարած տղամարդը հայ է եղել. ֆրանսիական ԶԼՄ-ների մանրամասները
Ֆրանսիայում մզկիթի մոտ երեկ վրաերթի փորձ կատարած 43-ամյա տղամարդը հայ է եղել: Այդ մասին հայտնում է Le Figaro-ն՝ վկայակոչելով քննությանը մոտ աղբյուրի: Հաղորդվում է, որ նա կենթարկվի հոգեբանական զննության: Հարցաքննության ժամանակ տղամարդը հայտնել է, որ ցանկանում էր վրեժ լուծել Փարիզում վերջին տարիների ընթացքում «Իսլամական պետություն» ահաբեկչական խմբավորման իրականացրած հարձակումների համար:
Հաղորդվում է, որ ձերբակալվածը չի եղել ալկոհոլի ազդեցության տակ:
Երեկ երեկոյան նրա տանը խուզարկություն է իրականացվել:
Ավելի վաղ հաղորդվել է, որ ֆրանսիական ոստիկանությունը երեկ ձերբակալել է տղամարդու, որն ավտոմեքենայով փորձել է վրաերթի ենթարկել Փարիզի արվարձաններից մեկի մզկիթի մոտ հավաքված մարդկանց խմբին: Միջադեպը տեղի է ունեցել Կրետեյ քաղաքում:
Միջադեպի հետևանքով ոչ ոք չի տուժել:
Ինչպես Le Parisien-ին պատմել է դեպքի վայրում ներկա եղած հավատացյալներից մեկը, իրենք վստահ են, որ նախկինում արդեն տեսել էին այդ վարորդին: Նրան, մասնավորապես, տեսել են մեկ օր առաջ, երբ նա ծաղկեպսակ է դրել տարածքում գտնվող Հայոց ցեղասպանության զոհերի հիշատակին նվիրված հուշատախտակին:
Ֆրանսիայի ներքին գործերի նախարար Ժերար Կոլոմն իր հայտարարությունում նշել է, որ տղամարդու իրական շարժառիթները կպարզվեն հետաքննության ընթացքում: Փարիզի ոստիկանապետը հայտնել է, որ կարվի հնարավոր ամեն բան վարորդի շարժառիթները պարզելու և նրա նկատմամբ քրեական պատասխանատվության տեսակը պարզելու համար:










