Ֆրանսիայում 8 մարդ է վիրավորվել մզկիթի մոտ հնչած կրակոցների հետևանքով

10:28 • 03.07.17

Ֆրանսիայի հարավում գտնվող Ավինյոն կոմունայում մզկիթի առջև հնչած կրակոցների հետևանքով 8 մարդ է վիրավորվել: Այդ մասին հայտնում է Reuters գործակալությունը՝ հավելելով, որ հետաքննությանը մոտ աղբյուրի համաձայն՝ փոխհրաձգությունը հաշիվների մաքրում է եղել, այլ ոչ ահաբեկչական հարձակում:


Ինչպես հայտնել է աղբյուրը, վիրավորներից երկուսը հոսպիտալացվել են: Նա հավելել է նաև, որ մզկիթից դուրս եկող հավատացյալները չեն եղել կրակոցների թիրախում:


La Provence շրջանային թերթը, վկայակոչելով դատական աղբյուրի, հայտնել է, որ ոստիկանությունը չի դիտարկում դեպքը որպես ահաբեկչություն: Համաձայն տեղեկությունների՝ այն եղել է երիտասարդների միջև վիճաբանություն:


Ականատեսների հաղորդմամբ՝ դեմքը փակ երկու զինյալներից մեկը կրակոցներ է արձակել երեկոյան ժամը 10:30-ին: Նրանք այնուհետև փախել են դեպքի վայրից:


Հաղորդվում է, որ վիրավորներից ոչ մեկ չի ստացել կյանքին սպառնացող վնասվածքներ: