ՌԴ ԱԳՆ-ն Բաքվից պահանջել է դադարեցնել հայկական ծագմամբ ՌԴ քաղաքացիների նկատմամբ խտրականությունը

13:21 • 05.07.17

Ադրբեջան ժամանող ՌԴ մի շարք քաղաքացիներ ենթարկվում են խտրականության ադրբեջանցի պաշտոնատար անձանց կողմից: Այդ մասին չորեքշաբթի լրագրողներին հայտնել են ՌԴ ԱԳՆ-ում, հայտնում է «ՌԻԱ Նովոստի»-ն:


Ինչպես բացատրել են ՌԴ արտաքին քաղաքական գերատեսչությունում, տարեսկզբից ի վեր ՌԴ 25 քաղաքացու արգելվել է մուտք գործել Ադրբեջան: ԱԳՆ-ի տեղեկություններով՝ որպես կանոն՝ ՌԴ քաղաքացիներին ժամեր շարունակ պահել են Բաքվի օդանավակայանում, մի շարք դեպքերում՝ առանց սննդի, ջրի և բժշկական օգնության, այնուհետև բռնի կերպով հետ ուղարկել իրենց հաշվին: Նախարարությունում պարզաբանել են, որ նման վերաբերմունքի համար հիմք են հանդիսացել հայկական անունները, ազգանունները, հայրանունները:


ՌԴ ԱԳՆ-ում ընդգծել են, որ Մոսկվան բազմիցս պահանջել է Բաքվից «դադարեցնել այդ վրդովեցնող պրակտիկան, քննություն իրականացնել և համապատասխան գնահատական տալ պաշտոնատար անձնաց պահվածքին», սակայն «միջադեպերի քննություն չի իրականացվել»:


ՌԴ ԱԳՆ-ում նշել են, որ Ադրբեջանի ԱԳՆ-ի պատասխան նոտայում ասվում է, որ Ադրբեջանը «ստիպված է կիրառել մի շարք անձանց նկատմամբ համապատասխան քայլեր՝ անցանկալի իրադարձությունները կանխելու համար»՝ ընդգծելով, որ այդ պատասխանն «անբավարար է»:


Մոսկվայում հայտարարել են, որ կշարունակեն պահանջել «վրդովեցուցիչ խտրական պրակտիկայի դադարեցում»: