Դոնալդ և Մելանյա Թրամփերն ԱՄՆ անկախության 241-ամյակի առթիվ ընդունելություն են կազմակերպել Սպիտակ տանը (լուսանկարներ)
Հուլիսի 4-ին Միացյալ Նահանգներում նշել են երկրի անկախության 241-ամյակը, ինչի առթիվ նախագահ և առաջին տիկին Դոնալդ և Մելանյա Թրամփերը հանդիսավոր ընդունելություն են կազմակերպել Սպիտակ տանը:
Ինչպես նշում է The Daily Mail-ը, նախագահական նստավայրում հյուրընկալվել են ամերիկացի զինծառայողները, որոնց առաջ ելույթ ունենալու ժամանակ ԱՄՆ նախագահը խոստացել է մշտապես հուսալի հենարան լինել զինվորականների ու նրանց ընտանիքների համար:
«Երախտապարտ ենք նրանց, աղոթում ենք նրանց համար ու ողջունում ենք նրանց անձնազոհ ծառայությունը»,-ասել է Թրամփն արտասահմանում ծառայող ամերիկացի զինվորների մասին:
Ինչպես ավելի վաղ հայտնել էր Tert.am-ը, երկրի անկախության 241-րդ տարեդարձի ամենադիտարժան մասն են կազմել անկրկնելի հրավառությունները:
Ընդհանուր առմամբ, Անկախության տոնի առթիվ տեղի է ունեցել 60.000-ից ավելի հրավառություն՝ գեղագիտական հաճույք պատճառելով հազարավոր հավաքվածներին:
Տոնի առթիվ կազմակերպվել են նաև աստղային համերգներ, որոնց ժամանակ ելույթ են ունեցել Ջենիֆեր Լոպեսը, Շերիլ Քրոուն, Բրեդ Փեյսլին և այլ հայտնիներ:
Հավելենք, որ 1776 թ. հուլիսի 4-ին ստորագրված Անկախության հռչակագիրը սկիզբ է դրել ամերիկյան պետականությանը: Հռչակագիրը դարձել է առաջին պաշտոնական փաստաթուղթը, որում գաղութներն անվանվել են «Ամերիկայի Միացյալ Նահանգներ»: Դարի այդ կարևորագույն փաստաթղթում իրենց արտացոլումն են գտել նաև ամերիկյան հեղափոխության տաղանդավոր գործիչների՝ Ջ. Վաշինգտոնի, Ջ. Ադամսի, Բ. Ֆրանկլինի, Թ. Փեյնի իրավաքաղաքական և ժողովրդավարական գաղափարները:
















