2018-2020 թվականներին ՀՀ կառավարությունը նախատեսում է միջինը 5,3 տոկոս տնտեսական աճ. Վարդան Արամյան
Առաջիկա երկու տարվա ընթացքում՝ 2018-2020 թվականներին ՀՀ կառավարությունը նախատեսում է միջինը 5,3 տոկոս տնտեսական աճ:
Ըստ նախագծի՝ ակնկալվում է, որ միջնաժամկետում ՀՆԱ-ի միջին 5.3% կանխատեսվող աճը հիմնականում պայմանավորված կլինի ծառայությունների և արդյունաբերության ճյուղերով:
Նախագիծը ներկայացնող ՀՀ ֆինանսների նախարար Վարդան Արամյանն ասաց,որ 2017 թվականի համար կանխատեսվում է 3.3%, իսկ 2018-2020 թվականներին՝ համապատասխանաբար 4.7%, 5.4% և 5.7 % տնտեսական աճ:
Նախարարի խոսքով՝ միջնաժամկետ ծրագրման համակարգի ներդրմամբ կլուծվեն մի շարք խնդիրներ, ինչպիսիք են մակրոտնտեսական հաշվեկշռվածությունը, այդ թվում նաև ռեսուրսների իրատեսական և համապարփակ փաթեթի ձևավորումը և այլն:
Արամյանի խոսքով՝ պետական ծախսերի միջնաժամկետ ծրագրումը շարունակական գործընթաց է՝ «քաղաքականությունների ձևակերպում - պլանավորում - բյուջետավորում» տրամաբանական ամբողջական շղթայի համատեքստում:
«Պետական ծախսերի միջնաժամկետ ծրագրումը հնարավորություն է տալիս մեղմել հասանելի բյուջետային ռեսուրսների և պահանջվող ծախսերի միջև հնարավոր անհամապատասխանությունը»,-ասաց նախարարը:
Բացի դրանից՝ նախարարը նշեց, որ նշված ծրագրի միջոցով հնարավոր է դառնում պետական ծախսերում կատարել պետական քաղաքականության փոփոխություններին համարժեք փոփոխություններ:










