Իրանի անվտանգության ուժերը ձերբակալել են ԻՊ-ի ավելի քան 20 գրոհայինի

16:45 • 06.07.17

Իրանի անվտանգության ուժերը երկրի հյուսիս-արևելյան Մաշհադ քաղաքում ձերբակալել են «Իսլամական պետություն» ահաբեկչական խմբավորման 21 գրոհայինի: Այդ մասին հայտնել է քաղաքի դատախազի տեղակալ Հասան Հեյդարին, գրում է «ՌԻԱ Նովոստի»-ն:


«Համակարգված և մասշտաբային գործողությունների արդյունքներով ձերբակալվել է ԻՊ-ի 21 գրոհային»,- ասել է Հեյդարին, ով նշել է, որ գործողություններն իրականացվել են Թեհրանում տեղի ունեցած ահաբեկչություններից հետո:


Հեյդարիի խոսքով՝ ձերբակալվածներից մի քանիսն իրանցիներ են, մյուս մասը՝ Աֆղանստանի քաղաքացիներ, որոնք անցնելով ռազմական պատրաստվածություն՝ կարողացել են Իրան մտնել կեղծ փաստաթղթերով՝ այնտեղ ահաբեկչական հարձակումներ իրականացնելու համար:


Հիշեցնենք, որ հունիսի 7-ին հարձակում է տեղի ունեցել Իրանի խորհրդարանի շենքում և Իմամ Խոմեյնիի դամբարանում: Ահաբեկչական հարձակումների հետևանքով զոհերի թիվը հասել է մոտ 20-ի: Երկրի ներքին գործերի փոխնախարար Հոսեյն Զոլֆաքարին հայտնել էր, որ ահաբեկիչները խորհրդարան էին մտել կանանց հագուստով:

Երկրի հետախուզության և ազգային անվտանգության նախարարությունը հայտարարել էր, որ Թեհրանում նախատեսվում էր իրականացնել 3 ահաբեկչական հարձակում, որոնցից մեկը տապալվել է, իսկ դրա հեղինակները՝ հինգ հոգի, ձերբակալվել են մինչ հարձակման իրականացումը:

Հարձակումների պատասխանատվությունը ստանձնել է «Իսլամական պետություն» խմբավորումը: