Էրդողանը Մերկելի հետ խոսել է քրդերի և Գյուլենի մասին (լուսանկար)
Թուրքիայի նախագահ Ռեջեփ Թայիփ Էրդողանը Գերմանիայի Համբուրգ քաղաքում հանդիպել է Գերմանիայի կանցլեր Անգելա Մերկելի հետ, հաղորդում է թուրքական haberler.com կայքը:
Աղբյուրը հաղորդում է, որ Էրդողանը Մերկելի հետ հանդիպման ընթացքում բարձրացրել է «Քուրդիստանի աշխատավորական կուսակցություն» խմբավորման՝ Գերմանիայում գտնվող անդամների հարցը, ինչպես նաև զրուցել Թուրքիայում 2016թ.-ի հուլիսի 15-ին տեղի ունեցած ռազմական հեղաշրջման փորձի գլխավոր կազմակերպիչը համարվող թուրք կրոնական քարոզիչ Ֆեթուլլ Գյուլենի մասին:
Հայտնի է, որ Էրդողանը դժգոհել է իրեն տեղի թուրքական համայնքի հետ հանդիպելու թույլտվություն չտրամադրելու առիթով:
Հիշեցնենք, որ ավելի վաղ Գերմանիայի արտաքին գործերի նախարար Զիգմար Գաբրիելը հայտարարել էր, որ ճիշտ չի գտնում Էրդողանի՝ Գերմանիայի թուրքական համայնքի հետ հանդիպման դիմումը բավարարելը։
Բեռլինի և Անկարայի միջև հարաբերությունները սրվել են վերջերս Ստամբուլում գերմանական պարբերականի թուրք լրագրող Դենիզ Յուջելի ձերբակալությունից ու կալանավորումից հետո: Նա թուրքական իշխանությունների կողմից կասկածվում է «ահաբեկչական կազմակերպությանը հարելու, տվյալների անօրինական օգտագործման, ահաբեկչության քարոզչության համար»: Գերմանիայի կանցլեր Անգելա Մերկելը պահանջել է Անկարայից ազատ արձակել Յուջելին։
Լարվածության ֆոնին Գերմանիայում չեղարկվել են Թուրքիայի արտաքին գործերի նախարար Մևլութ Չավուշօղլուի, արդարադատության նախարար Բեքիր Բոզդաղի և էկոնոմիկայի նախարար Նիհաթ Զեյբեկչիի ելույթներն ու հանդիպումները տեղի թուրքական համայնքի հետ:
Իր հերթին, Թուրքիայի նախագահ Ռեջեփ Թայիփ Էրդողանն, ի պատասխան Բեքիր Բոզդաղի` տեղի թուրքական համայնքի հետ հանդիպման չեղարկմանը, Բեռլինի ներկայիս քաղաքականությունը համեմատել էր «անցյալում նացիստների գործողությունների» հետ։










