Այստեղ լսում ենք խայտառակ ընտրախախտումների մասին, բայց ապրիլից հետո ես նման բան չեմ լսել ո՛չ «Ելքից», ո՛չ «Ծառուկյան» դաշինքից. Էդուարդ Շարմազանով
Կենտրոնական ընտրական հանձնաժողովի 2016 թվականի գործունեության վերաբերյալ հաշվետվությանն արտահերթ ելույթով հանդես եկավ ԱԺ փոխնախագահ Էդուարդ Շարմազանովը, ով նկատեց, որ ԿԸՀ-ն լուրջ բարեփոխումներ է իրականացրել:
«Հանձնաժողովը, ըստ իս, ապահովել է լիակատար թափանցիկություն, չի եղել մի դիմում, որին չարձագանքի: Յուրաքանչյուր գործընթացի վերաբերյալ գնահատական տալիս են»,-ասաց նա:
Շարմազանովը հիշեցրեց, որ եղել են միջազգային դիտորդական առաքելություններ, որ տվել են եզրակացություններ, օրինակ՝ ԵԱՀԿ/ԺՀՄԻԳ-ն ասում է, որ ընտրությունները լավ էին կազմակերպված, մյուսներն էլ են վկայել, որ ընտրությունները եղել են ժողովրդավարական:
«Իսկ այստեղ լսում ենք խայտառակ ընտրախախտումներ. ապրիլից հետո ես նման բան չեմ լսել ո՛չ «Ելքից», ո՛չ «Ծառուկյան» դաշինքից»,-նշեց նա և հավելեց, թե այսօր տեսնում է ավելի շատ ընդդիմադիր երևալու մրցավազք:
«Չի կարելի, եթե ասում եք՝ Հանրապետականը հանցագործ է և այլն, նախ պետք է կոռեկտություն ունենալ գործընկերների նկատմամբ, մենք մեզ երբեք թույլ չենք տվել նման բան անել»,-ասաց նա, ապա հիշեցրեց, որ ՀՀԿ-ն է այն ուժը, որը քաղաքական կամք դրսևորելով՝ գնաց ընտրական գործընթացների ու Ընտրական օրենսգրքի փոփոխության:
ԱԺ փոխնախագահը նաև բարեկամական խնդրանք, առաջարկ ուներ. «Դիմացինի վրա ցեխ շպրտելով՝ ձեր սեփական քաղաքական կշիռն ամենևին չի ավելանում»:










