Սան Ֆրանցիսկոյում կանխել են պատմության մեջ ամենախոշոր ավիաաղետը (տեսանյութեր)
ԱՄՆ Սան Ֆրանցիսկո քաղաքում դիսպետչերներին հաջողվել է կանխել ժամանակակից ավիացիայի պատմության մեջ ամենախոշոր աղետը՝ հինգ ինքնաթիռի բախում, հայտնում է CBC հեռուստաալիքը:
Միջադեպը տեղի է ունեցել հուլիսի 7-ի գիշերը: Վայրէջք կատարելիս Տորոնտոյից թռած Air Canada ավիաընկերության ուղևորատար ինքնաթիռը սխալմամբ ուղղվել է սխալ ճանապարհի կողմը, որտեղ այդ պահին եղել է ևս չորս ինքնաթիռ:
Դիսպետչերներին հաջողվել է ժամանակին կանգնեցնել օդաչուին: Ինքնաթիռը բարեհաջող վայրէջք է կատարել երկրորդ փորձից:
«Եթե դա ճիշտ է՝ տեղի ունեցածը շատ մոտ էր պատմության մեջ ամենախոշոր ավիավթարը լինելուն»,- ասել է United Airlines ավիաընկերության պաշտոնաթող կապիտան Ռոս Այմերը:
«Եթե դուք կարող եք պատկերացնել Airbus-ի բախումը վառելիքով լիարժեք լիցքավորված և ուղևորներով չորս ինքնաթիռի հետ, կարող եք ենթադրել՝ ինչ սարսափելի ավարտ կարող էր այդ ամենը ունենալ»,- ասել է Այմերը:
Օդանավակայանի վարչակազմը և տեղի իշխանությունները հետաքննում են միջադեպի հանգամանքները:










