Եղելությունները դրժող մարդը պետք է արժանապատվությունից զուրկ լինի. թուրք հրատարակիչը՝ Թուրքիայի կողմից Հայոց ցեղասպանությունը ժխտելու մասին

15:20 • 12.07.17

Թուրքիայի ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուի նախաձեռնած «Արդարության քայլերթ» անվամբ բողոքի երթը գրանցեց բոլորի համար անսպասելի արդյունքներ. այս մասին Երևանում լրագրողների հետ զրույցում ասաց ազգությամբ թուրք գրող-հրապարակախոս, հրատարակիչ Զեյնել Աբիդին Քըզըկյափրաքը:

«Իր ուժերից ավելիին հասավ Ժողովրդահանրապետական կուսակցությունը: Հաղթանակ եմ ես այդ «Արդարության քայլերթը» բնութագրում»,- ասաց նա:

Նա նշեց, որ Քըլըչդարօղլուն շատ պատահականությամբ է դարձել Ժողովրդահանրապետական կուսակցության նախագահ, բայց նա այդպես էլ առաջնորդ չդարձավ. լիդերի հատկանիշներից զուրկ մարդ է նա:

«Շատ կասկածում եմ, որ նա քայլերթից հետո ձեռք կբերի լիդերի հատկանիշներ»,- ասաց նա:

Tert.am-ի դիտարկմանը, թե արդյոք Թուրքիան Էրդողանին այլընտրանք առաջնորդ ունի, թուրք հրատարակիչը պատասխանեց, որ իրականում ընդդիմադիր դաշտում կա խնդիր, որը չի կարողանում իրենից առաջնորդներ ստեղծել:

Tert.am-ի մյուս հարցին, թե ինչ կարծիք ունի Թուրքիայի խորհրդարանում սպասվող օրենսդրական փաթեթի ընդունման մասին, ըստ որի, պատգամավորները կհեռացվեն և վարչական տուգանքի կենթարկվեն, եթե Թուրքիայի պատմությունը վիրավորող իրադարձություններից խոսեն, Զեյնել Աբիդին Քըզըկյափրաքը պատասխանեց. «Թուրքիայում ինչ-որ բան կանխորոշելը իրոք դժվար է, բայց ես չեմ կարծում, որ նման բանը օրենքի տեսք ստանա: Ազգային շարժում կուսակցությունը, որը հեղինակն է օրենքի, ամեն անգամ սաստում է «Արդարություն և զարգացում» կուսակցությանը, որ պետք է իրենք ազգային շահեր պաշտպանեն: Սակայն չեմ կարծում, որ ԱԶԿ-ը կգնա այդ քայլին, և դա օրենքի ուժ կստանա,- ասաց նա՝ նշելով, որ Թուրքիայի Հանրապետությունում չկա օրենքի մի հոդված, ըստ որի՝ «Հայոց ցեղասպանություն» եզրույթն ասողը խնդիր կունենա,- եթե սովորական քաղաքացին չի պատժվում դրա համար, ինչո՞ւ պետք է պատգամավորը դրա համար պատժվի»:

Թուրք հրատարակիչը, խոսելով Հայոց ցեղասպանության մասին ընկալումներից, նշեց, որ անձամբ ինքը, ապրելով ցեղասպանությունը վերապրած ժողովրդի մեջ, ցանկանում է իրեն հարգել:

«Եղելությունները դրժող մարդը պետք է արժանապատվությունից զուրկ լինի: Եթե դու պետություն ես աշխարհի քաղաքակրթության մեջ, նախևառաջ հարգանքի պետք է արժանի լինես»,- ասաց նա:

Խոսելով այսօրվա Թուրքիայի մասին՝ նա նշեց, որ այսօր այնտեղ հասարակությունը փոփոխվում է և դեպի լավ է փոխվում: «Ես կարծում եմ, որ այդ փոփոխություններ լավ բանի կբերեն: Նոր սերունդը տարբերվում է հնից, և դրան ոչ միայն համացանցն է օգնում, այլ նաև՝ ճամփորդելը»,- ասաց նա: