Իտալիայում մոտ 700 զբոսաշրջիկ է տարհանվել նավով՝ Սիցիլիայում մոլեգնող անտառային հրդեհների պատճառով (լուսանկարներ)
Իտալիայում մոտ 700 զբոսաշրջիկ է տարհանվել նավով՝ Սիցիլիայում մոլեգնող անտառային հրդեհների պատճառով, հայտնում է BBC-ն:
Ձկնորսները և նավերի սեփականատերերը միացել են փրկարարներին տարհանման իրականացմանն օգնելու համար, երբ կրակը մոտեցել է ծովափնյա Կալամպիզո հանգստավայրին:
Մոտակա Սան Վիտո Լո Կապո քաղաքի քաղաքապետ Մատեո Ռիզոն օգնության կոչ է արել բոլոր նրանց, ովքեր ունեն «ապահով և վստահելի նավեր»:
Նա Facebook սոցցանցի իր էջում Պալերմոյից արևմուտք ընկած գյուղում իրավիճակը «հրատապ» է անվանել:
Տարհանվածները տեղափոխվել են Սան Վիտոյի դպրոցներ: Քաղաքապետը կոչ է արել իր «կարեկից և մեծահոգի» քաղաքի բնակիչներին համախմբվել: Նա նշել է, որ անհրաժեշտ է մեքենաներով դիմավորել մարդկանց նավահանգստում և նրանց տեղափոխել դպրոցներ:
Կալամպիզոյի հրդեհի հետևանքով վիրավորների մասին չի հաղորդվում:
Հայտնի է, որ Իտալիայի հարավում ջերմաստիճանը հասել է +40 աստիճանի՝ առանց տեղումների ամիսներից հետո:
Իտալիայում փրկարարները պայքարում են մի քանի անտառային հրդեհի դեմ, որոնք առաջացել են Վեզուվ հրաբխի լանջերին: Հրդեհներից առաջացած ծուխը երևում է մոտակայքում գտնվող Նեապոլ քաղաքից:
Ազգային հրշեջ ծառայությունը հայտնել է, որ երկրի տարածքում չորեքշաբթի օրվա դրությամբ պայքարում է 288 անտառային հրդեհի տարածման դեմ:























