Կիմ Չեն Ընը միջմայրցամաքային բալիստիկ հրթիռի ստեղծողներին իր ասույթների ժողովածուն է նվիրել

12:41 • 13.07.17

Հյուսիսային Կորեայի ղեկավար Կիմ Չեն Ընը պարգևատրել է «Հվասոն-14» միջմայրցամաքային բալիստիկ հրթիռի (ՄԲՀ) ստեղծողներին՝ նրանց նվիրելով անվանական ժամացույցներ ու իր ասույթների ժողովածուն, հայտնում է ria.ru-ն՝ Կորեայի կենտրոնական հեռագրային գործակալությանը հղումով:

Շնորհավորական ուղերձում ղեկավարն ընդգծել է, որ «ՄԲՀ-ի բարեհաջող արձակումը պատմական կարևորություն ունեցող իրադարձություն է, որը հիմնովին փոխել է Հյուսիսային Կորեայի ռազմավարական դիրքն ու քաղաքական աշխարհակարգը»:

Աղբյուրը մանրամասնում է, որ «Հվասոն-14» հրթիռի ստեղծման աշխատանքում աչքի ընկածներն արժանացել են Կիմ Իր Սենի, Կիմ Չեն Իրի անվան, Պետական դրոշի առաջին աստիճանի շքանշանների, Հյուսիսային Կորեայի հերոսի և աշխատանքի հերոսի կոչումներին:

Ինչպես ավելի վաղ հայտնել էր Tert.am-ը, հուլիսի 3-ին Հյուսիսային Կորեայի կողմից արձակված բալիստիկ հրթիռն անցել է ավելի քան 930 կմ ու ընկել Ճապոնական ծովը:


Հյուսիսային Կորեայի կենտրոնական հեռուստատեսությունը հայտարարել է «Հվասոն-14» միջմայրցամաքային բալիստիկ հրթիռի առաջին հաջող փորձարկման մասին: Հայտարարությունում նշվում է, որ 39 րոպեի ընթացքում այն անցել է 933 կիլոմետր:


Հրթիռի արձակման մասին հրամանը տվել է ԿԺԴՀ առաջնորդը: Նա նաև հետևել է փորձարկմանը:


Ինչպես հայտնել են Ճապոնիայի պաշտպանության նախարարությունից, հրթիռն ընկել է Ճապոնական ծովը՝ Ակիտա պրեֆեկտուրայում Օգա թերակղզուց 300 կիլոմետր հեռավորության վրա: Ճապոնիայի պաշտպանական գերատեսչությունը նաև հայտնել է, որ հրթիռի թռիչքի բարձրությունը գերազանցել է 2500 կիլոմետրը:


Դրանից հետո ՄԱԿ-ում ԱՄՆ մշտական ներկայացուցիչ Նիքի Հեյլին հայտարարել էր, որ Վաշինգտոնը պատրաստ է գործի դնել բոլոր հնարավոր միջոցները, այդ թվում՝ նաև ռազմական ուժը, Հյուսիսային Կորեայի վարքը փոխելու համար։