Հուրգադայում տեղի ունեցած զինված հարձակման դեպքը, որի հետևանքով նաև ՀՀ քաղաքացիներ են տուժել, Եգիպտոսում «եզակի դեպք» են որակել (լուսանկարներ)

10:43 • 15.07.17

Եգիպտոսի Կարմիր ծով նահանգի նահանգապետ Ահմեդ Աբդալլան հայտարարել է, որ նախօրեին երեկոյան տեղի ունեցած զինված հարձակումը «եզակի դեպք» է, իսկ անվտանգության ուժերը նման իրավիճակում գործել են օպերատիվ, գրում է gazeta.ru-ն:

Ինչպես ավելի վաղ հայտնել է Tert.am-ը՝ Եգիպտոսի Հուրգադա քաղաքի հյուրանոցներից մեկում հուլիսի 14-ին դանակով զինված անձը հարձակում է իրականացրել զբոսաշրջիկների վրա: Միջադեպի հետևանքով Գերմանիայի երկու քաղաքացուհի զոհվել է: Բացի այդ, 4 զբոսաշրջիկ վիրավորվել է: Տուժածների թվում եղել են նաև ՀՀ քաղաքացիներ:

Նշվում է, որ ոստիկանությունը հրահանգ է ստացել ստուգել բոլոր բնակիչներին, հատկապես նրանց, ովքեր չեն աշխատում, բայց բնակվում են Հուրգադայում:

Հանցագործության համար կասկածվում է 27-ամյա Աբդուրահման Շաաբան Աբդուրահման Բադավին, որն ըստ ունեցած փաստաթղթերի՝ ուսանող է: Նա ձերբակալվել է։


Ինչպես իր թվիթերյան էջում հաղորդել է ՀՀ ԱԳՆ մամուլի խոսնակ Տիգրան Բալայանը` վկայակոչելով Եգիպտոսում ՀՀ դեսպանության տվյալները, վիրավորներից երկուսը ՀՀ քաղաքացիներ են: Ըստ նրա՝ Հուրգադայում տուժած ՀՀ քաղաքացիների կյանքին վտանգ չի սպառնում։

«Հանցագործը վնասազերծվել է մեր վիրավոր քաղաքացու օժանդակությամբ»,- հավելել էր նա: