Բաքուն խոչընդոտում է աբխազական երկաթգծի բացմանը, որ Հայաստանին շրջափակման մեջ պահի. ռուսաստանցի քաղաքագետ

10:24 • 15.07.17

Հատկապես Բաքուն և որոշ չափով Անկարան խոչընդոտում են Աբխազական երկաթգծի բացման գործընթացը: Tert.am-ի հետ զրույցում այս մասին ասաց Մերձավոր Արևելքի և Կովկասի երկրների հարցերով ռուսաստանցի փորձագետ Ստանիսլավ Տարասովը:

Վերջինս նշեց, որ Ռուսաստանի և Վրաստանի միջև ներկայումս լուրջ բանակցություններ են ընթանում, գործընթացն արագացնելու համար ՌԴ ԱԳ նախարարը վերջերս մեկնել էր Աբխազիա և Աբխազիան երկաթգիծը բացելու հարցում իր հավանությունը տվել է:

«Կարծում եմ, որ Աբխազական երկաթգծի բացումը, որը կվերականգնի Հայաստանի, Ռուսաստանի և Վրաստանի միջև հաղորդակցությունը, մոտ ապագայում տեղի կունենա: Այս գործընթացին խանգարում է Վրաստանի միջոցով Բաքուն, իսկ որոշ առումով նաև Թուրքիան, որովհետև պաշտոնական Անկարայի ուշադրությունը Մերձավոր Արևելքն է»,-ասաց Ստանիսլավ Տարասովը:

Վերջինս շեշտեց, Բաքուն խոչընդոտում է երկաթգծի բացմանը, որովհետև Հայաստանին մեկուսացնելու, շրջափակման մեջ պահելու քաղաքականություն է վարում:

«Ադրբեջանում հասկանում են, որ եթե երկաթգիծը բացվի, այն նոր հնարավորություններ կստեղծի Հայաստանի համար, սա կոմունիկացիա է, ՌԴ հետ կապերը խորացնելու նոր միջոց է: Իսկ Հայաստանը ԵԱՏՄ անդամ է, ՀԱՊԿ անդամ է, ունի բազմաթիվ առևտրային, ռազմական և այլ պայմանագրեր, որոնք ենթադրում են Ռուսաստանի հետ ակտիվ համագործակցություն»,- մանրամասնեց Ստանիսլավ Տարասովը:

Իսկ ահա Թուրքիայի պարագայում, ըստ նրա, իրավիճակը փոքր-ինչ այլ է: Տարասովն ասաց, որ պաշտոնական Անկարան խնդիր ունի «սեփական դաշտում ու դրանք լուծելով է զբաղված»:

«Թուրքիան սեփական դաշտում ֆուտբոլ է խաղում, իսկ սեփական դաշտում ֆուտբոլ խաղալ, նշանակում է՝ երբեմն պարտվել, երբեմն հավասարեցնել հաշիվը, հաղթել՝ հազվադեպ: Անկարան կարող է ազդել Բաքվի վրա, որ Բաքուն ավելի շատ հետևողական լինի այս հարցում, բայց հենց Թուրքիան այս պահին չունի դրա ժամանակը»,- ասաց Ս. Տարասովը:

Քաղաքագետի դիտարկմամբ՝ որոշակի դասավորվածության պարագայում հարցը մոտ ժամանակներում կարող է լուծվել, երկաթգիծը կբացվի, բայց ոչ հիմա: Ստանիսլավ Տարասովը շեշտեց, որ աբխազական երկաթգիծը կբացվի միայն այն ժամանակ, երբ տարածաշրջանում լինի հարաբերական անդորր: