Եթե խնդիրն այն է, որ ՌԴ-ում աշխատող հայ վարորդները լեզվի տիրապետում ունենան, դա կարգավիճակով լուծվող հարց չէ. Կարեն Բեքարյան
Հայաստանում ռուսերեն լեզվին կարգավիճակ տալու հետ կապված աղմուկը համարում եմ ավելին, քան իրականում կարիքը կա, որովհետև դա ռուսական կողմի պատկերացմամբ եղել է որպես լուծման օրինակ: ՀՀ ԱԺ-ի պատվիրակության կողմից եղել է հարցադրում և հարցադրմանը ուղղակի եղել է ինչ-որ արձագանք: Այս մասին Tert.am-ի հետ զրույցում ասաց ԱԺ պատգմավոր, ԱԺ Արտաքին հարաբերությունների մշտական հանձնաժողովի անդամ Կարեն Բեքարյանը։
«ԱԺ պատվիրակությունը ռուսական կողմին ներկայացրել է, որ խնդրի ֆորմալ իրականացումն այլ հարց է, բովանդակությունը՝ մեկ այլ հարց: Այսինքն՝ ասվել է Հայաստանի Հանրապետությունում ռուսերեն լեզվի դասավանդման, տիրապետման մասին: Հետևաբար, եթե խնդիրն այն է, որ դա պետք է նպատակ ունենա, որ աշխատողները լեզվի տիրապետում ունենան, դա կարգավիճակով լուծվող խնդիր չէ, որը ոնց որ թե բացատրվել է»,- նշեց Բեքարյանը:
Հիշեցնենք, որ ՀՀ ԱԺ պատվիրակության ռուսաստանյան պաշտոնական այցի ժամանակ ԱԺ նախագահ Արա Բաբլոյանի կողմից բարձրացվել է Ռուսաստանում ազգային վարորդական իրավունքներով աշխատելու արգելքի մասին խնդիրը, ինչին ի պատասխան ՌԴ պետդումայի խոսնակ Վյաչեսլավ Վոլոդինը առաջարկել է Հայաստանի իշխանություններին պաշտոնական կարգավիճակ տրամադրել ռուսերեն լեզվին, որպեսզի Ռուսաստանի տարածքում հնարավոր լինի ճանաչել հայկական վարորդական իրավունքները:
Կարեն Բեքարյանի համոզմամբ՝ վարորդական իրավունքների խնդիրը քննարկման առարկա կլինի և այդ քննարկումների արդյունքում ինչ-որ լուծումներ կգտնվեն, բայց նա չի կարծում, որ դա որևէ առնչություն կունենա լեզվի կարգավիճակի հետ:
Կարեն Բեքարյանը ոչ միայն Հայաստանում ռուսերեն լեզվին կարգավիճակ տալու հետ կապված աղմուկն է չափազանցված համարում, այլ նաև այն հայտարարությունները, որ Հայաստանը ԵԱՏՄ-ից դուրս գալու գործընթաց պետք է սկսի:
«Այս ամենը կարող էր լինել առանձնազրույցի ընթացքում՝ պատկերացումների, լուծման ճանապարհների շարքում, և որևէ կերպ դուրս չգար մամուլ: Մեր կողմից ասվեր, դիմացի կողմից պատասխանեին: Սովորական երևույթի ներքո ընթացած պրոցես է»,- նշեց Կարեն Բեքարյանը:










