Հրաչյա Հարությունյանը գտնվում է «Նուբարաշեն» ՔԿՀ-ում, պատժի կրման վայրը կորոշվի ՀՀ-ում դատավճիռը ճանաչելուց և այն կատարման ուղարկելուց հետո
Հուլիսի 20-ին ՌԴ-ից Հայաստան տեղափոխված Հրաչյա Հարությունյանը այս պահին գտնվում է «Նուբարաշեն» քրեակատարողական հիմնարկում: Նրա պատժի կրման վայրը կորոշվի առաջիկայում:
Այս մասին Tert.am-ին հայտնեցին ՀՀ արդարադատության նախարարության քրեակատարողական վարչության հանրային կապերի բաժնից:
Պատժի կրման վայրի վերաբերյալ ՀՀ ԱՆ քրեակատարողական վարչության հանրային կապերի բաժնից հայտնեցին. «ՀՀ ներպետական օրենսդրության համաձայն՝ պատիժը կատարելու ուղղիչ հիմնարկի տեսակը և վայրը որոշում է Հայաստանի Հանրապետության արդարադատության նախարարության քրեակատարողական վարչության տեղաբաշխման հանձնաժողովը: Հրաչյա Հարությունյանի պատիժը կրելու վայրը տեղաբաշխման հանձնաժողովը կորոշի ՀՀ իրավասու դատարանի կողմից ՌԴ իրավասու դատարանի դատավճիռը ճանաչելուց և այն կատարման ուղարկելուց հետո: Առայժմ Հրաչյա Հարությունյանը գտնվում է «Նուբարաշեն» քրեակատարողական հիմնարկում»:
Հիշեցնենք, որ 2013 թվականի հուլիսի 13-ին Պոդոլսկի շրջանում ԿԱՄԱԶ մակնիշի մեքենայով տեղի ունեցած ավտովթարի հետևանքով 18 մարդու մահվան պատճառ դարձած Հրաչյա Հարությունյանը մեղավոր է ճանաչվել ՌԴ Օրենսգրքի 264 (ճանապարհային երթևեկության և տրանսպորտային միջոցների շահագործման խախտման) և 327 (կեղծ փաստաթղթերի պատրաստում) հոդվածներով նախատեսված արարք կատարելու մեջ և դատապարտվել 6,9 տարի ազատազրկման:
Այսօր նա տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով՝ պատժի մնացած մասը՝ 2 տարի 9 ամիսը Հայաստանում կրելու համար:










