Ադրբեջանին զենք վաճառելու վերաբերյալ ՌԴ հիմնավորումները համոզիչ չեն. Արմեն Աշոտյան

12:47 • 22.07.17

Հայ-ռուսական օրակարգում գտնվող կնճռոտ հարցերից մեկը Ռուսաստանի կողմից Ադրբեջանին զենքի մատակարարումն է. Արմեն Աշոտյան

Հայ-ռուսական հարաբերությունների օրակարգում գտնվող ամենաբարդ և կնճռոտ հարցերից մեկը Ռուսաստանի կողմից Ադրբեջանին զենքի մատակարարումն է:

Այս մասին այսօր լրագրողների հետ զրույցում ասաց ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը:

«Իրականում պաշտոնական և ոչ պաշտոնական շփումներով հայ-ռուսական օրակարգի ամենաբարդ և կնճռոտ հարցը մնում է ռուսական զենքի մատակարարումն Ադրբեջանին: Դա հիմնավորվում է որպես տնտեսական գործարք, ռազմաքաղաքական պոտենցիալը հսկելու գործոն և այլն, դրանք համոզիչ չեն: Փակ քննարկումներ ենք ունեցել վերջին այցի ընթացքում և մեր ռուս գործընկերներից շատերը կիսում են մեր մտահոգությունները»,-ասաց Աշոտյանը:

Դիտարկմանը, թե փաստորեն զենքի մատակարարումն Ադրբեջանին վնասում է Հայաստանին, Արմեն Աշոտյան ասաց, որ դա այն հարցերից մեկն է, որը լուծման կարիք ունի:

Աշոտյանի կարծիքով՝ զենքի մատակարարման խնդիրը պետք է պահել օրակարգում, սակայն խնդրի կարգավորումը հանրային քննարկումների դաշտում չէ, քաղաքական հետևողական հիմնավորումների մեջ է։

«Իհարկե, հանրությունը պետք է տեղեկացված լինի, սակայն ակնկալել, որ այնտեղ լուծում կգտնվի, կամ նման խնդիրների քննարկումը վերածել ռեալիթի շոուի, ապա ես այդ տեսակետին չեմ»,– ասաց նա:

Արմեն Աշոտյանը մեկ դիտարկում ևս արեց՝ ՀՀ քաղաքական գործիչները ոչ թե Ռուսաստանի շահերի, այլ հայ-ռուսական հարաբերությունների պաշտպաններ են:

Դիտարկմանը, թե նույնն առկա՞ է ռուսական կողմում, Արմեն Աշոտյանը դրական պատասխան տվեց և ավելացրեց.«Երկիր, ում հետ Հայաստանի քաղաքական օրակարգը բացարձակ նույն համընկնումն ունի, գոյություն չունի, բացառությամբ Արցախի Հանրապետության»: