Ինտերպոլը հրապարակել է Եվրոպայում հարձակումների վտանգ ներկայացնող 173 ահաբեկչի ներառող ցանկ

12:36 • 22.07.17

Ինտերպոլը կազմել է 173 ահաբեկիչ-մահապարտից բաղկացած ցանկ, որում ներառված են «Իսլամական պետություն» (ԻՊ) ահաբեկչական խմբավորման մի շարք անդամներ, որոնք կարող են նախապատրաստական աշխատանք անցած լինել՝ Եվրոպայի տարածքում ահաբեկչություններ իրականացնելու համար:

Ինչպես հայտնում է The Guardian-ը` հիմնվելով ձեռքի տակ հայտնված փաստաթղթի վրա, ցանկում ներառված են մարդիկ, որոնք, հնարավոր է, սովորել են հավաքել ու տեղադրել ինքնաշեն ռումբեր՝ վնասվածքներ հասցնելու ու մարդկանց սպանելու համար:

Աղբյուրը նկատում է, որ թեև ներկայում Ինտերպոլը տեղեկություն չունի այն մասին, որ ցանկում նշված անձինք գտնվում են Եվրոպայի տարածքում, այնուհանդերձ՝ հրապարակված փաստաթուղթը ցույց է տալիս ահաբեկչության խնդրի իրական մասշտաբը:

Նշվում է, որ ցանկը կազմելու համար անհրաժեշտ տվյալներն ի սկզբանե հավաքվել են ամերիկյան հետախուզության օգնությամբ՝ Սիրիայում և Իրաքում ռազմական օպերացիաների ժամանակ հուսալի աղբյուրների միջոցով: