Ես Պուտինի պես կպատասխանեմ՝  կորոշեմ վերջին օրը. ՓՊ նախկին նախագահը՝ պալատի ընտրություններին մասնակցելու և պալատին հակակշռող մարմնի մասին

19:33 • 25.07.17

Փաստաբանների պալատի նախկին նախագահ Ռուբեն Սահակյանը սեպտեմբերին կայանալիք Փաստաբանների պալատի նախագահի ընտրություններին մասնակցելու կամ չմասնակցելու մասին կհայտնի թեկնածուների առաջադրման վերջին օրը:

Այս մասին Tert.am-ի հետ զրույցում ասաց փաստաբան, Փաստաբանների պալատի  նախկին նախագահ Ռուբեն Սահակյանը:

«Բոլոր  նրանք, ովքեր երազում են, որ ես մասնակցեմ  կամ չմասնակցեմ պալատի նախագահի ընտրություններին, ես Պուտինի պես կպատասխանեմ՝    կորոշեմ վերջին օրը: Ընդամենը ինտրիգի համար: Ես բնավորությամբ ուրախ մարդ եմ, ոչ որոշ մարդկանց նման,  ովքեր մտածում են՝ հանկարծ Սահակյանը թեկնածությունը չդնի, հնարավոր է խնդիրներ առաջանան»,-ասաց Սահակյանը:

Հարցին, թե ՓՊ նախկին նախագահն այն կարծիքի՞ն է, որ պալատը հակակշռող մարմին չունի և անհրաժեշտ է ստեղծել հակակշռող մարմին, պետք է վերադառնալ 1998-ի ձևաչափին, Ռուբեն Սահակյանն ասաց, որ ինքն այլ մոտեցման կողմնակից է:

«Ես հոգով, սրտով համամիտ չեմ, որ մենք ունենանք  փաստաբանական երկու առանձին միավորում: Ես սրտանց դեմ եմ այդ գաղափարին, որովհետև կողմ եմ եղել միավորման գաղափարին , բայց վերջին չորս տարիները ցույց տվեցին, որ   հարկավոր է ունենալ մեկ և ավելի միավորումներ»,-ասաց փաստաբանը:

Նրա խոսքով՝ նախկինում մտածել է, որ մեկ անձը որոշիչ դեր կարող է խաղալ փաստաբանության մեջ.« Այնուհետև ես  հասկացա, որ անձը կարող է բացասական ազդեցություն ունենալ  փաստաբանության ապագայի ու կյանքի համար, դրա համար այլ մոտեցման կողմնակից եմ»,-եզրափակեց Սահակյանը:

Նշենք, որ Պալատի նախագահի նախորդ ընտրությունները տեղի են ունեցել 2013 թվականի սեպտեմբերի 14-ին, որին մասնակցել է չորս  թեկնածու՝  Աշոտ Թադևոսյանը, Կրոմվել Գրիգորյանը,  Տիգրան Աթանեսյանը և Արա Զոհրաբյանը:2013-ին ընտրվել է  Արա Զոհրաբյանը: