Նախակրթական հաստատություններում սննդի կազմակերպման համար ներկայացվող պահանջները չեն բավարարվում. Վահե Դանիելյան
ԳՆ Սննդամթերքի անվտանգության պետական տեսչությունն այս ժամանակահատվածում մեծ ուշադրություն է դարձրել հատկապես նախակրթական և հանրակրթական ուսումնական հաստատություններում սննդամթերքի անվտանգության խնդիրներին:
Սննդամթերքի անվտանգության և որակի հսկողության տեսչության պետ Վահե Դանիելյանը Tert.am-ի հետ զրույցում պարզաբանեց, թե ոլորտին մեծ ուշադրություն դարձնելու հիմքում քաղաքացիների բողոքները չեն: Նրա խոսքով՝ իրենց աշխատանքի և ուսումնասիրության արդյունքներն են ցույց տվել, որ այդտեղ մեծ անելիք կա:
«Այստեղ աշխատանք ունենք ոչ միայն մենք, այլև տեղական ինքնակառավարման մարմինները: Բան այն է, որ նախակրթական և հանրակրթական ուսումնական հաստատությունները գտնվում են ՏԻՄ ենթակայության ներքո»,- ասաց նա:
Դանիելյանը նկատեց, որ սննդային թունավորում որակում են այն, երբ աղտոտվածությունն անցնում է սննդի միջոցով: Միևնույն ժամանակ նա նշեց, որ 90 տոկոսից ավելի դեպքերում սննդային թունավորում են որակում այն, երբ սնունդը երկրորդային աղտոտվածության կամ մարդկային գործոնի հետևանքով է աղտոտվում:
«Սրան զուգահեռ մեր թե՛ նախակրթական, թե՛ հանրակրթական ուսումնական հաստատություններում սննդի կազմակերպման որակը ներկայացվող պահանջներին չի համապատասխանում, մենք դեռ գնահատում ենք այս ոլորտն անբավարար: Եթե խոսենք մարզերի մասին, ապա այնտեղ ունենք 70-ական թվականների կառուցված շենքեր, որոնք ունեցել են տիպային բուֆետներ։ Դրանք այժմ չեն գործում, ստեղծվել են հարմարեցված սենյակներ, որտեղ չկան հիգիենայի համար ներկայացվող պահանջները»,- շարունակեց Դանիելյանը:
Սննդամթերքի անվտանգության և որակի հսկողության տեսչության պետը նշեց, որ հարցի կարգավորման հետ կապված մարզպետարաններում հանդիպումների շարք են սկսել՝ շարադրելով խնդիրներն ու պահանջները: Դանիելյանի գնահատմամբ՝ միայն իրենց վերահսկողությամբ խնդիրը չի կարգավորվում, և յուրաքանչյուր մարմին պետք է գիտակցի պատասխանատվության իր չափը:










