Հյուսիսկորեական թերթը պատմել է՝ ինչու է ԿԺԴՀ-ն ցուցադրում իր հզորությունը
Հյուսիսային Կորեան կշարունակի միջուկային և հրթիռային հզորության ցուցադրումը՝ մինչև ԱՄՆ-ն չդադարի այդ երկրի նկատմամբ թշնամական քաղաքականությունը: Այդ մասին հայտնում է «ՌԻԱ Նովոստի»-ն՝ վկայակոչելով հյուսիսկորեական «Նոդոն սինմուն» թերթը:
«Հվասոն-14» միջմայրցամաքային բալիստիկ հրթիռի երկրորդ փորձարկման մեծ հաջողությունը մեր կուսակցության և ժողովրդի հեղափոխական հավատի հզոր ցուցադրությունն էր: Մեր կուսակցությունը և ժողովուրդը պատրաստ են հարվածներ հասցնել՝ մինչև ամերիկացի իմպերիալիստները չդադարեցնեն Կորեայի նկատմամբ թշնամական քաղաքականությունը և ծնկաչոք ներողություն չխնդրեն մեր ազգին հասցված տանջանքների համար»,- ասված է ԿԺԴՀ-ում վերջին հրթիռային փորձարկմանը նվիրված թերթի հոդվածներից մեկում:
Ավելի վաղ հաղորդվել էր, որ Կորեայի Ժողովրդադեմոկրատական Հանրապետությունը նոր բալիստիկ հրթիռ է արձակել Ճապոնական ծովում Հոկայդո կղզու ուղղությամբ։ Նշվում է, որ Փհենյանի կողմից բալիստիկ հրթիռի գիշերային փորձարկում առաջին անգամ է իրականացվել։
Հյուսիսային Կորեայի առաջնորդ Կիմ Չեն Ընը հայտարարել է, որ «Հվասոն-14» միջմայրցամաքային բալիստիկ հրթիռի բարեհաջող փորձարկումներն «ԱՄՆ-ին ուղղված խիստ նախազգուշացում» են և ևս մեկ անգամ ապացուցում են երկրի կարողությունը՝ հրթիռային արձակումներ իրականացնել ցանկացած կետից՝ ցանկացած պահի։
Հուլիսի սկզբին Հյուսիսային Կորեայի կենտրոնական հեռուստատեսությունը հայտարարել էր «Հվասոն-14» միջմայրցամաքային բալիստիկ հրթիռի առաջին հաջող փորձարկման մասին: Հրթիռն անցել էր հետագծով, որը փորձագետների կարծիքով՝ կարող է թույլ տալ հարվածել ԱՄՆ Ալյասկա նահանգին:
Նշենք, որ վերջին տարիներին Հյուսիսային Կորեան ակտիվորեն զարգացնում է իր միջուկային ծրագիրն ու պարբերաբար բալիստիկ հրթիռների արձակումներ իրականացնում՝ շարժելով Արևմուտքի զայրույթը:
Պաշտոնական Փհենյանը բազմիցս հայտարարել է, որ սադրանքի դեպքում պատրաստ է երկրի երեսից ջնջել ԱՄՆ-ն:










