Վենեսուելայում երկու օրվա ընթացքում զոհերի թիվը հասել է 16-ի (լուսանկարներ)
Վենեսուելայում կիրակի տեղի ունեցած ազգային հիմնադիր ժողովի ընտրություններից հետո սկսված բողոքի ցույցերի ընթացքում զոհվել է 16 մարդ: Այդ մասին հայտնել է Ազգային ժողովի պատգամավոր Էնրի Ռամոսը, գրում է «ՌԻԱ Նովոստի»-ն:
«Այս սարսափելի բացասական օրերը ծանր հետևանք են ունեցել՝ 16 վենեսուելացի է սպանվել»,- գրել է Ռամոսը Twitter-ի իր էջում:
Ավելի վաղ իշխանությունները, մասնավորապես Կարակասի քաղաքապետ Խորխե Ռոդրիգեսը, հերքել են, որ ընտրությունների օրը զոհեր են գրանցվել:
Ռամոսը նաև հայտնել է, որ ընդդիմության տվյալներով՝ ընտրություններին մասնակցությունը կազմել է մոտ 2,5 միլիոն՝ գրանցված 19,4 մլն ընտրողից: Պատգամավորը հստակեցրել է, որ ընտրություններին չի մասնակցել ընտրողների 88 տոկոսը:
Ավելի վաղ Վենեսուելայի ՆԳՆ-ն մինչև 10 տարի ժամկետով ազատազրկման սպառնալիքով արգելել էր ցույցերի և հանրահավաքների անցկացումը հուլիսի 28-ից օգոստոսի 1-ն ընկած ժամանակահատվածում:
Վենեսուելայում ապրիլի սկզբից բողոքի զանգվածային ակցիաներ են սկսվել, երբ Գերագույն դատարանը որոշել էր սահմանափակել ընդդիմադիր Ազգային ժողովի իշխանությունը: Որոշումը շուտով չեղյալ էր հայտարարվել, սակայն ընդդիմության ներկայացուցիչները փողոց են դուրս եկել՝ պահանջելով դատարանի անդամների պաշտոնանկությունն ու արտահերթ ընտրությունների անցկացում: Նրանք նաև բողոքում են հիմնադիր ժողովի գումարման դեմ՝ դա համարելով Սահմանադրությունը փոփոխելու փորձ: Ապրիլից ի վեր Վենեսուելայում ցույցերի հետևանքով ավելի քան 110 մարդ է զոհվել, հարյուրավոր մարդիկ վիրավորվել են և ձերբակալվել:






















