Թուրքիայի իշխանությունները պատրաստվում են քանդել Սևան Նշանյանի՝ Իզմիրում գտնվող տունը (լուսանկար)

09:24 • 01.08.17

Պոլսահայ մտավորական Սևան Նշանյանի ու նրա գործընկեր, թուրք պրոֆեսոր Ալի Նեսինի կողմից Թուրքիայի Իզմիր նահանգի Սելչուկ շրջանում հիմնադրված զբոսաշրջային գյուղական համայնքի տները կքանդվեն դեռևս 2011թ.-ին իշխանությունների կայացրած որոշման համաձայն: Քանդվելիք շուրջ 50 շինությունների ցուցակում է նաև Նշանյանի առանձնատունը:

Ինչպես գրում է թուրքական t24.com.tr կայքը, քանդման որոշումը կայացվել էր դեռևս 2011թ.-ին, սակայն դրա իրագործումը հետաձգվել էր տեղի բնակիչների բողոքների ու ցույց տված դիմադրության շնորհիվ:

Հիշեցնենք, որ Նշանյանը թուրքական դատարանի կողմից դատապարտվել էր 17 տարվա ազատազրկման՝ ապօրինի շինարարության և հարկերից խուսափելու համար առաջադրված մեղադրանքով:

Շաբաթներ առաջ հայտնի դարձավ, որ 3.5 տարի բանտում գտնվող Սևան Նշանյանը փախուստի է դիմել:

Ավելի ուշ թուրքական «Հյուրրիյեթ» պարբերականին տված հարցազրույցում Նշանյանն ասել էր.

«Ես չէի կարող թույլ տալ, որ այս խեղկատակությունը շարունակվի: Որոշ ժամանակ անց կարող եմ դուրս գալ երկրից: Բայց Թուրքիան մեր երկիրն է: Անպայման մի օր կվերադառնանք: Թուրքիայից փախչելը շատ հեշտ է: Որոշակի գումար վճարող յուրաքանչյուրը, ինչպես տեսաք, կարողանում է փախչել: Անվտանգության աշխատողներին էլ եթե տաք այդ գումարը՝ շատ հանգիստ կարող եք փախչել»:

Օրեր առաջ հայտնի դարձավ, որ Նշանյանը Հունաստանում է և տեղի իշխանություններից ժամանակավոր կացության իրավունք է ստացել: