«Վեոլիա ջուր» ընկերությունը ջրի սակագները բարձրացնելու պահանջով կդիմի ՀԾԿՀ

17:20 • 02.08.17

 

Հայաստանի ջրամատակարարման օպերատոր «Վեոլիա ջուր» ընկերությունը պատրաստվում է դիմել Հանրային ծառայությունները  կարգավորող հանձնաժողով` ջրի սակագները բարձրացնելու հարցով. այս տեղեկությունը Tert.am-ի հետ զրույցում հաստատեց  «Վեոլիա Ջուր» ընկերության մամուլի խոսնակ Մուրադ Սարգսյանը:

Ըստ նրա՝ դեռևս հստակ չէ, թե սակագների ինչ չափի բարձրացում է ընկերությունը նախատեսում պահանջել: «Հաջորդ շաբաթ հստակ կլինի, հնարավոր է  փոփոխություններ կատարվեն: Այս պահին քննարկումներ են գնում՝ հիմնավորելու ինչքան դրամով բարձրացվեն»,-ասաց նա:

Մուրադ Սարգսյանը հստակեցրեց, որ գործընթացը կատարվում է օրենքի պահանջով, ըստ որի՝ ամեն տարի ընկերությունը պետք է հայտ ներկայացնի սակագնի փոփոխության նպատակով: «Դրա համար էլ սահմանված ժամկետում մենք պատրաստվում ենք հայտ ներկայացնել»,-ասաց նա:

Նշենք, որ ըստ հրապարակումների՝ «Վեոլիա ջուր» ընկերությունը առաջարկում է ներկայում 1 խ.մ. ջրի արժեքը սահմանված 180 դրամից հասցնել 194.3 դրամի: Խոշոր բաժանորդների համար սակագինը 54 դրամից առաջարկվում է հասցնել 58.3-ի:

ՀՀ հանրային ծառայությունները կարգավորող հանձնաժողովի նախագահի տեղակալ Միքայել Սողոմոնյանը Tert.am-ի հետ զրույցում ասաց, որ դեռևս հայտ չեն ստացել ջրի սակագնի բարձրացման պահանջով: «Օրենքի պահանջով պետք է ընկերությունը թերթերում հայտարարություն տա դիմելուց առաջ»,- ասաց նա և նշեց, որ Հանրային ծառայությունները կարգավորող պետական հանձնաժողով սակագնի մասին հայտ ներկայացնելով՝ ընկերությունը պետք է փաստաթղթերով հիմնավորի պահանջը:

Հանձնաժողովը հայտը պետք է քննի այն ստանալուց հետո 90 օրվա ընթացքում: