«Նենց որ քիչ ծխեք». վարչապետի արձագանքը ծխելու դեմ պայքարի ռազմավարության ընդունմանը

12:01 • 03.08.17

 

Առողջապահության նախարար Լևոն Ալթունյանն այսօր կառավարության ընթացքում ներկայացրեց Ծխելու դեմ պայքարի ռազմավարությանը և այդ ռազմավարության 2017-2020 թվականների միջոցառումների ծրագրին հավանություն տալու մասին որոշման նախագիծը:

Ռազմավարության  ներդրման նպատակն է միջոցներ իրականացնել` ուղղված Հայաստանում ծխախոտի օգտագործման, սպառման նվազեցմանը, պահպանել բնակչության առողջությունը` պաշտպանելով ծխախոտի ծխի երկրորդային ազդեցությունից և  նվազեցնել ոչ վարակիչ հիվանդությունների հիվանդացության ցուցանիշները` կրճատելով ծխախոտի օգտագործումը:

Ռազմավարությունը նախատեսվում է իրականացնել հետևյալ ուղղություններով.

1. Հայաստանի Հանրապետությունում ծխելու դեմ պայքարի ուղղությամբ բոլոր շահագրգիռ կողմերի ակտիվ համագործակցության իրականացում: 

2. Ծխելու դեմ պայքարին ուղղված գործող օրենսդրական դաշտի վերանայում և լրամշակում: 

3.  Ծխելու դեմ պայքարին ուղղված գործունեություն իրականացնող առողջապահական կազմակերպությունների կարողությունների զարգացում:

4. Դեռահասների շրջանում ծխելու դեմ ուղղված միջոցառումների իրականացում:

5. Հայաստանի Հանրապետությունում ծխախոտի օգտագործման հետևանքով առողջությանը հասցված վնասների տվյալների ու մասշտաբների վերլուծության, հիմնական գործոնների, պատճառների բացահայտման և համաճարակաբանական հսկողության արդյունավետ գործընթացի իրականացում:

6.  Ծխախոտի օգտագործման հետևանքով առաջացած վնասների  և հետևանքների  վերաբերյալ հանրության իրազեկվածության մակարդակի բարձրացում:

Այսպիսով՝ ռազմավարության ներդրման ընթացքում ակնկալվում է իրականացնել մի շարք իրավական ակտերի փոփոխություններ և լրացումներ` ԱՀԿ Ծխելու դեմ պայքարի Շրջանակային կոնվենցիայի պահանջներին համահունչ: Նախագծում նշված է, որ Ռազմավարությամբ իրականացվող միջոցառումներն իրականացվելու է մեկ փուլով, 2017-2020 թվականների ընթացքում ակնկալվող հետևյալ  արդյունքներով.

Ծխախոտի օգտագործման տարածվածության (տարեկան 1,5-2 %-ով) նվազեցում,

15 և բարձր տարիքի տղամարդկանց շրջանում ծխախոտի օգտագործման տարածվածության ընթացիկ ցուցանիշի հարաբերական  կրճատում մինչև 10%-ով:

Երկրորդային ծխի ազդեցության նվազեցում, որը կնպաստի արյան շրջանառության համակարգի հիվանդություններից, չարորակ նորագոյացություններից, թոքերի քրոնիկ  օբստրուկտիվ հիվանդություններից և շաքարային դիաբետից ընդհանուր և վաղաժամ մահացության կրճատում 5%-ով:

Վերջում վարչապետ Կարեն Կարապետյանը, անդրադառնալով նախագծին, արձագանքեց. «նենց որ քիչ ծխեք»: