Անընդհատ 600 հոգի այստեղ է, բայց առայժմ մարդկային ուժն այդքան էլ արդյունավետ չէ հրդեհի մարման աշխատանքների համար. Արարատի փոխմարզպետ  

15:37 • 14.08.17

«Խոսրովի անտառ» պետական արգելոցում բռնկված հրդեհի մարման աշխատանքներին աջակցելու համար կամավորագրվել են բավական մեծ թվով քաղաքացիներ. այս մասին Tert.am-ին ասաց Արարատի մարզպետի տեղակալ Աշոտ Վարդանյանը, ով կամավորների խմբի հետ արդեն քանի օր է «Խոսրովի անտառում» է: 

«Արդեն 3 օր է, ինչ աշխատանքներն ընթանում են, կոնկրետ մեր մարզպետի գլխավորությամբ շտաբ է ստեղծվել, բոլորս այստեղ ենք, ԱԻՆ-ի հետ աշխատում ենք, փորձում ենք ուժերի ներածին չափով աջակցել անտառի պաշտպանությանը»,– ասաց նա՝ ավելացնելով, որ իրենց հետ են նաև համայնքի ղեկավարները՝ շուրջ 80 համայնք, ամեն մեկը տասը հոգով:

«Անընդհատ 600 հոգի այստեղ է, որպեսզի իրար փոխարինեն, բայց առայժմ մարդակային ուժն այդքան էլ արդյունավետ չէ, քամին խանգարում է աշխատանքներին: Ամեն դեպքում այստեղ ենք և սպասում ենք ԱԻՆ-ի գլխավորությամբ ստեղծված  համապատասխան  շտաբի հանձնարարականին, թե ինչ կտան քաղաքացիական մարդկանց»,- ավելացրեց Աշոտ Վարդանյանը:


Հիշեցնենք, որ օգոստոսի 12-ին, Արարատի մարզի Ուրցաձոր գյուղից մոտ 20 կմ հյուսիս՝ «Խոսրովի անտառ» պետական արգելոց պետական ոչ առևտրային կազմակերպության «Զիմա» կոչվող տարածքում բռնկվել էր բուսածածկ տարածք: Ըստ խիստ նախնական տվյալների՝ 200-250 հա տարածքում այրվել է բուսածածկ և անտառածածկ տարածք: Ըստ ԱԻՆ-ի՝ օգոստոսի 14-ին, ժամը 14:00-ի դրությամբ դեպքի վայրում գտնվում են 75 փրկարար, ՀՀ ՊՆ 132 զինծառայող, ոստիկանության 70 աշխատակից, անտառտնտեսության 50 աշխատակից, 1-ին անցակետում են գտնվում մոտակա գյուղերի 60 գյուղապետ՝ մոտ 600 բնակչի հետ: