Բարսելոնայում օդանավակայանի աշխատակիցները 24-ժամանոց գործադուլ են սկսել

12:09 • 14.08.17

Բարսելոնայի Էլ-Պրատ օդանավակայանում ուղևորների և ուղեբեռի ստուգման բաժնի աշխատակիցները երկուշաբթի 24-ժամանոց գործադուլ են սկսել, հայտնում է «ՌԻԱ Նովոստի»-ն:


Գործադուլի կոմիտեն չի համաձայնել տարվա ընթացքում յուրաքանչյուր աշխատակցի համար 200 եվրոյով աշխատավարձի բարձրացման մասին իրենց գործատու Eulen ընկերության և Կատալոնիայի կառավարության առաջարկին: Գործադուլի մասնակիցները, որոնց աշխատավարձերը կազմում է 900-ից 1100 եվրո, պահանջում էին իրենց 15 ամսվա ընթացքում վճարել լրացուցիչ 250-ական եվրո: Կիրակի գործադուլի կոմիտեի 150 մասնակից դեմ է քվեարկել առաջարկին, կողմ է քվեարկել միայն 36 հոգի:


«Բարսելոնայում անհնար է ստանալ ամսական 900 եվրո աշխատավարձ, դա չի բավարարի անգամ բնակարան վարձելու համար»,- հայտարարել է գործադուլի կոմիտեի փաստաբանը:


Գործադուլը սկսվել է անցած շաբաթ:


Մի քանի օր շարունակ ստուգման ծառայության աշխատակիցներն ամեն օր 4 անգամ 1 ժամով դադարեցրել են իրենց աշխատանքը, ինչի հետևանքով օդանավակայանում հերթեր են գոյացել: