Բարսելոնայի ահաբեկչությունից վիրավորների թիվը հասել է 80-ի. կա 13 զոհ. կասկածյալներից մեկը սպանվել է, մյուսի ինքնությունը հաստատված է (լուսանկարներ, տեսանյութ)

21:00 • 17.08.17

23:22

Բարսելոնայի հիվանդանոցում 80 մարդ է բուժօգնություն ստանում օգոստոսի 17-ին տեղի ունեցած ահաբեկչությունից հետո:

Այս մասին հայտնել է Կատալոնիայի տարածքային կառավարության ղեկավար Կառլես Պուինգդեմենտը: Նրա խոսքով՝ վիրավորներից 15-ի վիճակը ծայրահեղ ծանր է:

CNN-ի հաղորդմամբ Facebook սոցիալական ցանցն ակտիվացրել է անվտանգության ստուգման ծառայությունը, որը հնարավորություն է տալիս Բարսելոնայում գտնվողներին տեղեկացնել իրենց անվտանգության մասին:

Հիշեցնենք, որ ավելի վաղ հաղորդվում էր 13 զոհի և 60 վիրավորի մասին: 



22:59

Կատալոնիայի ոստիկանությունը հաղորդել է բանակցություններ չի վարում ահաբեկիչների հետո, ովքեր նախորդ հաղորդման համաձայն թաքնվել էին ռեստորանում:

«Ոչ ոք չի թաքնվել Բարսելոնայի ռեստորանում: Մենք մի տղամարդու ենք ձերբակալել, կատարվածը որակվել է որպես ահաբեկչություն», Lenta.ru-ի հաղորդմամբ՝ ասվում է ոստիկանության թվիթերյան էջում:

Ինչպես հաղորդում է El Periodico պարբերականը, երկու կասկածյալներից մեկը սպանվել է փոխհրաձգության ժամանակ:

Վերջին տվյալների համաձայն Լա Ռամբլա փողոցում իրականացված վրաերթի զոհերի թիվը կազմում է 13, իսկ վիրավորներինը գերազանցել է 60-ը:



21:49

 

Բարսելոնայում մարդկանց բազմության մեջ փիքափի մխրճվելու հետևանքով զոհերի թիվը հասել է 13-ի: Դեպքի հետևանքով վիրավորների թիվը 56 է: 


21:27

Իսպանական լրատվամիջոցները հրապարակել են Բարսելոնայի ենթադրյալ ահաբեկչի լուսանկարը:

Ոստիկանությունը հաղորդում է, որ նա 1.70 սմ հասակով տղամարդ է: Նրա հագին սպիտակ վերնաշապիկ է եղել: Հավանաբար, նա Կատալոնիայի հրապարակի մոտակա Լա Ռամբլա փողոցում վրաերթ իրականացրած վարորդն է:

Լա Ռամբլա փողոցը համարվում է Բարսելոնայի զբոսաշրջային հատվածի սիրտը, որտեղ բազմաթիվ այցելուներ են զբոսնում: Միջադեպից հետո, որին տասնյակից ավելի մարդիկ են զոհ գնացել և շուրջ 32 վիրավոր կա այս պահի դրությամբ, փակվել են մետրոյի կայարանն ու խանութները:

Իսպանիայի վարչապետ Մարիանո Ռախոյը հայտնել է, որ կապ է պահում ոստիկանների հետ և մտադիր են այցելել վիրավորներին:


 

21:07

Բարսելոնայի ոստիկանությունը Լա Ռամբլա փողոցում տեղի ունեցած վրաերթը որակել է որպես ահաբեկչություն: El Periodico-ի հաղորդմամբ՝ ոստիկանները փնտրում են երկրորդ ֆուրգոնը, որը կարող է կապ ունենալ միջադեպի հետ:

Աղբյուրի հաղորդմամբ՝ հանցագործները կարող էին երկրորդ մեքենան վարձել փախուստի դիմելու համար:

Ոստիկանությունը երկու մարդու է որոնում, որոնք միջադեպից անմիջապես հետո թաքնվել էին «Լա Բոկերիա» շուկայի մոտակայքում գտնվող «Ստամբուլի բույրեր» թուրքական ռեստորանում:

21:02

Բարսելոնայում տեղի ունեցած ահաբեկչության հետևանքով զոհերի թիվը հասել է 13-ի:

Ինչպես հաղորդում է իսպանական El Periodico-ն, պաշտոնական աղբյուրի տեղեկացմամբ՝ միկրոավտոբուսով վրաերթ իրականացրած վարորդը մուսուլման է:

Վերջինս կարող է թաքնված լինել մոտակա ռեստորանում, որտեղ, հավանաբար, պատանդներ է վերցրել: Ոստիկանները շրջապատել են դեպքի վայրը:

 

20:53

Առնվազն 13 մարդ զոհվել է Բարսելոնայի կենտրոնական Լա Ռամբլա փողոցում տեղի ունեցած ահաբեկչական հարձակման հետևանքով, երբ սպիտակ գույնի մինիվենի վարորդը վրաերթի է ենթարկել հավաքված մարդկանց:

Ինչպես հաղորդում է El Periódico պարբերականը՝ վկայակոչելով ոստիկանական աղբյուրներին, վիրավորների թիվը հասնում է 20-ի: Միջադեպը տեղի է ունեցել տեղի ժամանակով 15:00-ին (17:00՝ երևանյան) մարդաշատ փողոցում, որը նախատեսված է հետիոտնի համար:

Հաղորդվում է, որ վարորդը լքել է մեքենան և ոտքով հեռացել ենթադրյալ հանցակցի հետ, որը թաքնվելիս է եղել «Ստամբուլի բույրեր» կոչվող թուրքական ռեստորանում, որը տեղակայված է «Լա Բոկերիա» հայտնի շուկայում: 

 20:30

Բարսելոնայի սրտում՝ Ռամբլա կենտրոնական հետիոտն փողոցում, մինիվեն տեսակի մեքենան վրաերթի է ենթարկել մարդկանց ամբոխին:

Ինչպես հաղորդում է РИА Новости-ն՝ վկայակոչելով 24 Horas իսպանական հեռուստաալիքը, ոստիկանությունը հաստատել է միջադեպի փաստը: Կատարվածի հետևանքով տուժածներ կան: Փակվել են հայտնի զբոսաշրջային կենտրոնի մոտակա մետրոյի կայարանն ու խանութները:

Իշխանությունները խորհուրդ են տալիս մարդկանց չմոտենալ դեպքի վայրին, որտեղ գտնվում են «շտապ օգնության» մեքենաները: Բժիշկներն օգնություն են ցուցաբերում տուժածներին:

Իսպանական աղբյուրի հաղորդմամբ՝ այդ շրջանում բազմաթիվ զբոսաշրջիկներ են եղել: