Չինաստանում բացվել է առաջին առցանց դատարանը
Չինաստանի Չժեցզյան նահանգի Հանչժոու քաղաքում բացվել է առաջին ինտերնետային դատարանը, այս մասին գրում է РИА Новости գործակալությունը:
Այն բացելու որոշումը կայացվել է երկրի Կոմունիստական կուսակցության կենտրոնական կոմիտեի 36-րդ նստաշրջանի ժամանակ, որն ուղղված է եղել Չինաստանում բարեփոխումների բազմակողմանի խորացման ծրագրին:
Յուրօրինակ այս դատարանը զբաղվելու է կիբեռհանցագործությունների, առցանց պարտային պայմանագրերի և համացանցում հեղինակային իրավունքների խախտման վերաբերյալ գործերով:
Ամբողջ դատական գործընթացը՝ սկսած հայցի ներկայացումից մինչև քրեական գործի հարուցում, տեղի է ունենալու դատարանի կայքի միջոցով:
Նշենք, որ չինական այս քաղաքում կիբեռհանցագործությունների վերաբերյալ դատական բողոքներն աննախադեպ մեծ թիվ են կազմում: 2013թ.-ին երկրի դատարանը քննել է այդպիսի 600 գործ, անցյալ տարի այդ թիվը հասել է 10.000-ի:










