Հրապարակված տեսանյութը ցույց է տալիս, թե ինչպես է ահաբեկիչների մեքենան սլանում Բարսելոնայի Լաս Ռամբլաս փողոցով (տեսանյութ)
Իսպանական ԶԼՄ-ները հրապարակել են տեսահսկման համակարգերից ստացված կադրեր, որոնցում երևում է, թե ինչքան արագ է ահաբեկիչների ֆուրգոնն անցել Լաս Ռամբլաս փողոցով Բարսելոնայում հինգշաբթի տեղի ունեցած ահաբեկչական հարձակման ժամանակ, գրում է Business Insider-ը:
Mediaset և El Pais լրատվամիջոցները կադրերը ձեռք են բերել տեսանյութում երևացող սրահի սեփականատիրոջից: Այն հավանաբար պատկերասրահ է եղել:
Կադրերում երևում է, թե ինչպես են հետիոտները խուսափում փողոցով սլացող մեքենայի հարվածից: Մանկական սայլակով մի զույգ վայրկյանների տարբերությամբ է միայն հասցնում փախչել սլացող մեքենայի դիմացից:
Նկատելով փողոցում խառնաշփոթը՝ պատկերասրահում գտնվող մարդիկ թեքվում են դեպի պատուհանը:
Ինչպես ավելի վաղ հայտնել էր Tert.am-ը, Բարսելոնայի ամենահայտնի զբոսաշրջային վայրերից մեկում՝ Լաս Ռամբլաս փողոցում, ֆուրգոնը մխրճվել էր հետիոտների ամբոխի մեջ՝ խլելով 13 մարդու կյանք և վնասվածքներ հասցնելով 100-ից ավելի մարդու:
Ահաբեկչության պահին հազարավոր մարդիկ զբոսնել են ծառաշատ մայթերով փողոցով, երբ վարձակալված ֆուրգոնը մխրճվել է ամբոխի մեջ: Խուճապահար զբոսաշրջիկները շտապել են պատսպարվել հուշանվերներ վաճառող մոտակա խանութներում, ռեստորաններում ու եկեղեցիներում, մյուսներն էլ չկողմնորոշվելով՝ պարզապես վազել են փողոցով:
Բարսելոնայի կենտրոնում տեղի ունեցած ահաբեկչությունից հետո տեղի է ունեցել նաև երկրորդ ահաբեկչական հարձակումը 120 կիլոմետր հեռավորությամբ գտնվող Կամբրիլս քաղաքում: Մեքենան վրաերթի է ենթարկել մարդկանց, հաղորդվել է 1 զոհի և մի քանի վիրավորի մասին: Ոստիկանները սպանել են հինգ հարձակվողներին, որոնցից մի քանիսը կեղծ պայթուցիկ գոտիներ են կրել:
Բացի այդ, նույն օրը՝ օգոստոսի 17-ին, կատալոնական Ալկանար քաղաքում պայթյուն է որոտացել, որի հետևանքով մեկ մարդ է զոհվել և առնվազն մեկ մարդ վիրավորվել: Ոստիկանությունը ենթադրում է, որ տարածքում պայթուցիկներ էին պատրաստվում:










