Ղրղզստանի վարչապետը հայտարարել է, որ հրաժարական է տալիս նախագահական ընտրություններին մասնակցելու համար
Ղրղզստանի վարչապետ Սոորոնբայ Ժեենբեկովը երկուշաբթի կառավարության նիստի ժամանակ հայտարարել է, որ հրաժարական է տալիս երկրի նախագահի ընտրություններին մասնակցելու համար, գրում է «ՌԻԱ Նովոստի»-ն:
Ավելի վաղ նա դարձել է նախագահական մրցապայքարի երրորդ պաշտոնապես գրանցված մասնակիցը:
Ավելի վաղ թեկնածուի կարգավիճակ է ստացել ևս երկու նախկին վարչապետ՝ «Ակ-Շումքար» կուսակցության առաջնորդ Թեմիր Սարիևը և «Հանրապետություն» կուսակցության առաջնորդ, պատգամավոր Օմուրբեկ Բաբանովը:
Ժեենբեկովի խոսքով՝ հրաժարականի մասին որոշման կայացման գլխավոր փաստարկ է դարձել այն, որ «ընտրությունների ժամանակ երկրին անհրաժեշտ է լիարժեք վարչապետ, որպեսզի կառավարությունն աշխատի»: Ժեենբեկովը նաև ընդգծել է բոլոր թեկնածուների համար հավասար պայմանների ապահովման կարևորությունը:
Պաշտոնյան հայտարարել է նաև, որ մտադիր է շարունակել երկրի առաջնորդ Ալմազբեկ Աթամբաևի քաղաքականությունը երկրի նախագահ ընտրվելու դեպքում:
Ղրղզստանի նախագահական ընտրությունները նախատեսված են հոկտեմբերի 15-ին:










