Չինաստանում թայֆունի զոհերի թիվը հասել է 16-ի (լուսանկարներ, տեսանյութ)

12:50 • 24.08.17

Չորեքշաբթի ցերեկը Չինաստանի հարավը պատուհասած «Խատո» թայֆունի զոհերի թիվը հասել է 16-ի: Այս մասին հայտնում է РИА Новости-ն՝ հղում անելով Չինաստանի կենտրոնական հեռուստատեսությանը:

Ավելի վաղ հաղորդվել է 12 զոհի և 270 տուժածի մասին:

Աղբյուրի հաղորդմամբ՝ «Խատո» թայֆունը, որն այս տարի դարձել է ամենահզորը Չինաստանում, չորեքշաբթի ցերեկը հասել է Գուանդուն նահանգի Չժուհայ քաղաքի ծովափ, ինչպես նաև Հոնկոնգ և Մակաո հատուկ վարչական շրջաններ:

Նշվում է, որ զգալիորեն թուլացած թայֆունը Գուանդուն նահանգից տեղափոխվել է Գուանսի-Չժուանյան ինքնավար շրջան: Օդերևութաբանների կանխատեսումների համաձայն՝ հինգշաբթի օրն ուժեղ անձրևներ և մինչև 10 բալ ուժգնությամբ քամի է սպասվում նաև Գույչժոու, Յունան և Սիչուան նահանգներում:

Associated Press գործակալության տվյալների համաձայն՝ թայֆունը լուրջ խափանումներ է առաջացրել երկրի ամբողջ հարավային մասի տրանսպորտային համակարգում. կանգնեցվել է երթևեկությունը մի քանի արագընթաց երկաթուղային ճյուղերով, այդ թվում՝ Գուանչժոու-Շենչժեն-Հոնկոնգ և Սյամեն-Շենչժեն գծերում:

Դրանից բացի, ուժեղ հեղեղները և քամիները փլուզել են շինություններ, տապալել ծառեր ու կտրել կապի և էլեկտրահաղորդման գծեր: Ուժեղ ալիքների պատճառով տուժել են Հոնկոնգի և Շենչժենի կամուրջները և ծովային նավահանգիստները: