Ճապոնիան Կորեական թերակղզում աճող լարվածության ֆոնին զորավարժություններ է սկսել Ֆուձիյամա լեռան մոտ (լուսանկարներ, տեսանյութ)
Ճապոնիայի ինքնապաշտպանության ուժերը հինգշաբթի՝ օգոստոսի 24-ին, եռօրյա զորավարժություններ են սկսել: Զորավարժությունները, որոնց մասնակցում է մոտ 2.400 զինվոր, անցկացվում են Կորեական թերակղզում աճող լարվածության ֆոնին, գրում է The Straits Times-ը:
Ֆուձիյամա լեռան մոտակայքում անցկացվող զորավարժությունների նպատակը երկրի հեռավոր կղզիների վրա հնարավոր հարձակմանը զինված ուժերի պատրաստումն է: Միևնույն ժամանակ, Տոկիոյին նաև մտահոգում են ԱՄՆ-ի Գուամ կղզու ուղղությամբ հրթիռներ արձակելու մասին Հյուսիսային Կորեայի սպառնալիքները և Չինաստանի ու Ռուսաստանի հետ տարածքային վեճերը:
«Կան տարբեր խնդիրներ և անորոշ գործոններ, այնպիսիք, ինչպիսիք Արևելյան և Հարավչինական ծովերի շրջանում ստատուս-քվոն փոխելու Չինաստանի փորձերը, Հյուսիսային Կորեայի կողմից բալիստիկ հրթիռների և միջուկային զենքի զարգացումը, ինչպես նաև Ռուսաստանի կողմից Հեռավոր Արևելքում իր ներկայության ցուցադրումը»,- ասել է Ճապոնիայի ինքնապաշտպանության ուժերի շտաբի պետ գեներալ Կոձի Յամաձակին:
Ավելի վաղ հաղորդվել է, որ Հյուսիսային Կորեայի կողմից Գուամ կղզու ամերիկյան ռազմաբազաները հրթիռակոծելու սպառնալիքից հետո Ճապոնիայի իշխանությունները հրթիռային համակարգեր են տեղակայել Տոկիոյի կենտրոնում:
Կորեական թերակղզում իրավիճակը չափազանց լարված է մնում: Հուլիսին ԿԺԴՀ-ն երկու անգամ բալիստիկ հրթիռների փորձարկումներ է իրականացրել, ինչը սուր արձագանք է ստացել ԱՄՆ-ի, Ճապոնիայի և Հարավային Կորեայի կողմից:
Ավելի վաղ հաղորդվել է, որ Միացյալ Նահանգներն ու Հարավային Կորեան «Ըլչի-Ֆրիդոմ գարդիան» անվամբ համատեղ տասնօրյա զորավարժություններ են սկսում: Չնայած ԱՄՆ-ն և Հարավային Կորեան պնդում են, որ զորավարժությունները պաշտպանական բնույթ են կրում, ԿԺԴՀ-ն դատապարտել է դրանց անցկացումը՝ նախազգուշացնելով, որ դրանք կարող են հանգեցնել աղետալի հետևանքների: Փհենյանում վստահ են, որ զորավարժությունների նպատակը Հյուսիսային Կորեայի տարածք ներխուժման նախապատրաստումն է:
Կորեայի կենտրոնական հեռագրային գործակալությունն ավելի վաղ հայտարարել էր, որ Փհենյանն ուսումնասիրում է ցանկացած պահի գործողության միջին և մեծ շառավղով «Հվասոն -12» հրթիռներով Գուամ կղզում Միացյալ Նահանգների ռազմաբազաներին հարվածելու վերաբերյալ ծրագիրը: Սրան ի պատասխան ԱՄՆ նախագահ Դոնալդ Թրամփն ասել էր, որ Գուամին հարվածելու դեպքում, ԱՄՆ-ն Հյուսիսային Կորեայի հետ այնպիսի բան կանի, որ նախկինում ոչ ոք չէր տեսել:
Այնուհանդերձ՝ վերջին շրջանում 2 պետությունների ղեկավարները նախընտրել են մի կողմ դնել ռազմաշունչ հայտարարությունները: Մասնավորապես՝ Կիմ Չեն Ընն ասել է, որ պատրաստ է միառժամանակ հետաձգել Գուամին հարվածելու որոշման իրականացումն ու տեսնել, թե ԱՄՆ-ն իրեն ինչպես կդրսևորի, իսկ Թրամփը հավանություն է տվել այս որոշմանը:























