Թեմայի հետ կապված առարկություն չունենք, փակման պատճառը աշխատանքային կանոնակարգն է. Ա. Ամիրյանը՝ «Խավարում» ցուցահանդեսի մասին

12:48 • 14.09.17

Կառավարության նիստից հետո ՀՀ մշակույթի նախարար Արմեն Ամիրյանը լրագրողների հետ զրույցում անդրադարձավ Թումանյանի տուն-թանգարանի նախաձեռնած՝ բոլշևիկյան բռնատիրության զոհերին նվիրված «Խավարում» խորագիրը կրող ցուցահանդեսի փակմանը, ինչի պատճառը, ըստ Մշակույթի փոխնախարար Արև Սամուելյանի, դրա «քաղաքականացված» լինելն է:

«Թեմայի հետ կապված մենք որևէ առարկություն չունենք, առավել ևս տարվա ընթացքում այս թեման մենք արծարծել ենք տարբեր առիթներով: Թանգարանային գիշերն ունեցել է թեմայի ենթավերնագիր, սեպտեմբերի 22-ին Ազգային գրադարանում բացվում է նույն թեմայով ցուցադրություն, հրատարակվել են գրքեր, հանձնարարական ունենք ՀՀ նախագահից՝ մշակել առանձին թանգարան՝ ստալինյան բռնապետության զոհերի հետ կապված»,-ասաց նա:

Նախարարը նշեց, որ ցուցահանդեսի փակման պատճառը աշխատանքային ներքին կանոնակարգն է: Նա ասաց, որ որևէ ցուցադրություն թանգարանը պիտի համապատասխանեցնի նախարարության հետ, նախարարության ներկայացրած տարեկան սուբսիդիայի պայմաններում որևէ տեղ նշված չկա այս ցուցադրության մասին:

Ինչ վերաբերում է նրան, թե 22 օր եղել է ցուցադրությունը, ապա նոր փակվել է, Արմեն Ամիրյանն արձագանքեց. «Սուբսիդիայի պայմաններում կամ առանձին համաձայնեցված ոչ մի պայմանավորվածություն չի եղել նախարարության հետ: Այո, մենք տեղյակ չենք եղել այդ ցուցադրության մասին, ես տեղեկացվել եմ կիսամյակին հաշվետվության ժամանակ՝ բացումից 1 շաբաթ հետո մոտավորապես: Խոսքը աշխատանքային փոխհարաբերություններին է վերաբերում: Մենք առաջարկել ենք վերատեսության ենթարկել, գա ու նախարարության համապատասխան վարչության հետ համաձայնեցնեն, ձևակերպումներ անելուց հետո ցուցադրությունը նորից կարող է վերականգնվել, բովանդակության հետ կապված ոչ մի առարկություն չունենք»,-ասաց նա:

Անդրադառնալով թանգարանի տնօրեն Նարինե Թուխիկյանի հայտարարություններին, թե իրեն սպառնացել են ԱԱԾ-ից, որպեսզի ցուցադրությունը փակի, նախարարը շեշտեց, որ որևէ մեկն իրավունք չունի թանգարանի տնօրենին սպառնալ: Նա ասաց, որ եթե եղել են սպառնալիքներ, ապա սպառնացողը պատասխան կտա: «Ես անձնապես որևէ խնդիր չունեմ բովանդակության հետ, որովհետև այնտեղ ցուցադրված նյութում արծարծվում են նաև իմ ազգականների անունները»,-ասաց նա և նշեց, որ կնախաձեռնի, որպեսզի ցուցադրությունը վերաբացվի: Ըստ նրա՝ Նարինե Թուխիկյանը լավագույն տնօրեններից է: