Ոչ մի «սև ցուցակ» Արցախը փակ չի պահի միջազգային հանրության համար. Ստանիսլավ Տարասով

16:41 • 16.09.17

Ադրբեջանի աբսուրդային դիրքորոշումը մի շարք հարցերի առիթ է տալիս, քանի որ այդ երկիրը կորցնում է ադեկվատությունը: «Արմենպրես»-ի հետ զրույցում, մեկնաբանելով երեկ իսրայելցի բլոգեր Ալեքսանդր Լապշինի՝ ադրբեջանական բանտից ազատվելուց հետո սոցցանցի իր էջում կատարած առաջին գրառումն Ադրբեջանում անցկացրած դաժան օրերի մասին, նման տեսակետ է հայտնել ռուս քաղաքագետ Ստանիսլավ Տարասովը:

«Լապշինի գործն ընդհանրապես դատարկ, անիմաստ նախաձեռնություն էր, և  թե ինչու Ադրբեջանը  մտավ դրա մեջ, մինչ այժմ չեմ էլ հասկանում: Ինձ թվում է՝ այն հետապնդում էր որոշակի նպատակներ՝  հաշվի առնելով, որ Լապշինը մի քանի երկրների  քաղաքացի է՝  այդ թվում, նաև Ռուսաստանի և Իսրայելի,   իրենից  ներկայացնում է ինչ-որ մի նշանակալի դեմք,  ում հայտարարությունները կարող են փոխել հասարակական կարծիքը: Ադրբեջանը  պետք է լրջորեն մտածի իր գործողությունների մասին»,-ասել է նա:

Քաղաքագետը շեշտել է, որ ոչ մի «սև ցուցակ» Արցախը փակ չի պահի միջազգային հանրության համար: Նրա հավաստմամբ՝  դա երբեք չի լինի:

«Արցախ այցելել են և շարունակելու են այցելել  լրագրողներ, պատգամավորներ  և քաղաքական գործիչներ, քանի որ, հաշվի առնելով տարածաշրջանում տեղի ունեցող զարգացումները,  նրանք պարտավոր են այնտեղ լինել»,-եզրափակել է Ստանիսլավ Տարասովը: