Քուվեյթի իշխանությունները ԿԺԴՀ դեսպանին մեկ ամիս ժամանակ են տվել երկրից հեռանալու համար

17:49 • 17.09.17

Քուվեյթում ԿԺԴՀ դեսպանը պետք է հեռանա երկրից մինչև մեկ ամիս տրված ժամկետի լրանալը: Այդ մասին հայտնել է AFP գործակալությունը՝ վկայակոչելով քուվեյթցի դիվանագետին: 

Նրա տեղեկութոյւններով՝ որոշում է կայացվել նաև դադարեցնել վիզաների տրամադրումը ԿԺԴՀ-ի քաղաքացիներին: Գործակալությունը նշում է, որ այդ հայտարարությունն արվել է Քուվեյթի էմիր, շեյխ Սաբահ ալ-Ահմեդ ալ-Ջաբեր աս-Սաբահի և ԱՄՆ նախագահ Դոնալդ Թրամփի բանակցություններից հետո: 

Հիշեցնենք, որ Հյուսիսային Կորեան ուրբաթ հերթական բալիստիկ հրթիռն է արձակել, որը թռել է Ճապոնական Հոկայդո կղզու վրայով դեպի Խաղաղ օվկիանոս: 

Սա արդեն վեցերորդ անգամն է, որ ԿԺԴՀ-ն Ճապոնիայի տարածքի վրայով հրթիռ է արձակել: Այն թռել է տեղական ժամանակով ժամը 06:57-ին (Երևանի ժամանակով 01:57): Յոթ րոպե անց այն հասել է Ճապոնիայի օդային տարածք, իսկ տեղական ժամանակով 07:16-ին արդեն ընկել է ջուրը: 

Հիշեցնենք, որ Հյուսիսային Կորեայի իշխանությունները սեպտեմբերի 3-ին պաշտոնապես հայտարարել են միջմայրցամաքային բալիստիկ հրթիռների համար նախատեսված ջրածնային ռումբի բարեհաջող փորձարկման մասին: Հզոր միջուկային փորձարկման հրամանը տվել է երկրի առաջնորդ Կիմ Չեն Ընը: Հարավային Կորեայի պաշտպանական կոմիտեի փոխանցմամբ՝ պայթյունի ուժգնությունը եղել է 100 կիլոտոննա, ինչը բավական է մի ամբողջ քաղաք վերացնելու համար: 

Վերջին մի քանի ամսվա ընթացքում Կորեական թերակղզու շուրջ ճգնաժամային իրավիճակ է ստեղծվել: Արևմուտքը Փհենյանից պահանջում է վերջ տալ միջուկային փորձարկումներին ու դադարեցնել միջուկային ծրագրի զարգացումը՝ սպառնալով հակառակ դեպքում ռազմական միջամտության դիմել: Մինչդեռ պաշտոնական Փհենյանն անտեսում է կոչերն ու իր հերթին սպառնում միջուկային զենքով ջախջախիչ հարված հասցնել ԱՄՆ-ին: