Հոլիվուդի Փառքի ծառուղում բացվել է լեգենդար Ջինա Լոլոբրիջիդայի աստղը (լուսանկարներ, տեսանյութ)

Իտալական կինոարվեստի լեգենդար դերասանուհի Ջինա Լոլոբրիջիդան, որին ժամանակին կոչում էին «աշխարհի ամենագեղեցիկ կինը», Հոլիվուդի Փառքի ծառուղում արժանացել է իր անվանական աստղին:

Ինչպես նշում է The Daily Mail-ը, 90-ամյա իտալուհին նման պատվի է արժանացել կինոարվեստում ունեցած ձեռքբերումների համար:

Դատելով ստորև ներկայացված ֆոտոշարքից՝ դերասանուհին կարևոր միջոցառմանը նախապատրաստվել է մեծ ոգևորությամբ: Նա կրել է վառ կապույտ, ոսկեզօծ նախշերով տոնական հանդերձ, երկարաճիտ կոշիկներ, աչքի ընկնող դիմահարդարում արել:

Աղբյուրը մանրամասնում է, որ Լոլոբրիջիդայի անվան աստղը հանրահայտ Փառքի ծառուղում 2.628-րդն է:

Իր բեղուն կարիերայի ընթացքում իտալուհին նկարահանվել է տասնյակ ֆիլմերում, որոնցից ամենահայտնին են «Հաղթել սատանային», «Բոնա սերա», «Կուզիկը Նոտր Դամից»:

Հոլիվուդյան գերաստղ Համֆրի Բոգարտը, որը Լոլոբրիջիդայի հետ նկարահանվել է «Հաղթել սատանային» ֆիլմում, մի առիթով ասել է.«Ջինայի կողքին խամրում է անգամ Մերիլին Մոնրոն»: