Պետության կողմից նոր պարտք վերցնելն ինձ համար շատ անհասկանալի է. Մեսրոպ Մանուկյան

Պետության կողմից նոր պարտք վերցնելն ինձ համար շատ անհասկանալի է, քանի որ վարչապետի շուրթերից հնչում է, որ մոտ 90 մլն դոլարի չափով պետբյուջեն ավելցուկ է ունեցել, հետևաբար այս պարագայում լրացուցիչ 250 մլն դոլար վերցնելը մի քիչ անհասկանալի է՝ ինչու ենք մեզ վրա նման բեռ վերցնում:

Tert.am-ի հետ զրույցում նման կարծիք հայտնեց տնտեսագետ Մեսրոպ Մանուկյանը՝ անդրադառնալով նրան, որ Արժույթի միջազգային հիմնադրամն առաջիկայում «Սթենդ-բայ» ծրագրով Հայաստանին $250 մլն կտրամադրի:

Տնտեսագետը մտահոգություն է հայտնում, որ Կառավարությունը չի ներկայացնում՝ թիրախային ինչ խնդիրներ են լուծվելու այդ գումարով, ինչ օգուտ է տալու այն երկրին, նոր պարտքի արդյունավետությունը որն է լինելու, լրացուցիչ ինչ բարիք է այն ստեղծելու. «Առաջին տպավորությունն այն է, որ այդ 250 մլն դոլար վարկը պարզապես սպառողական նպատակների է ծառայելու: Սպառողական նպատակներ ասելով՝ ենթադրում եմ, որ կա´մ արտաքին պարտք պետք է սպասարկվի, կա´մ բյուջեի ծախսերը փակվեն, այսինքն՝ այն որևէ արժեք չի ստեղծելու»:  

Մեսրոպ Մանուկյանը կարծում է՝ Կառավարությունը պարտավոր է ժողովրդին տեղեկացնել ծրագրի էությունը և պարզաբանել՝ սրանով թիրախային ինչ խնդիրներ են լուծվելու. «Եթե այն նպատակային օգտագործվի, ապա, կարծում եմ, որ այդ 250 մլն դոլարը գործազրկության մակարդակի վրա կազդի, այսինքն՝ գործազրկությունը կկրճատվի»: