«Դիմում ենք Իսրայելի կառավարությանը՝ Ադրբեջանին սպառազինության մատակարարումը դադարեցնելու պահանջով»․ բազմաթիվ իսրայելցիներ բողոքի երթ են անցկացնում
Իսրայելում բողոքի ակցիա է անցկացվում ընդդեմ Ադրբեջանին զենք վաճառելու: Բողոքի ակցիան ներառում է ավտոշարասյունով երթ Հայֆայից մինչև Երուսաղեմ: Ինչպես փոխանցում է РИА Новости-ն, կազմակերպիչների խոսքով՝ երթին տասնյակ ավտոմեքենաներ և մի քանի հարյուր մարդ է մասնակցում:
«Դիմում ենք Իսրայելի կառավարությանը՝ խնդրանքով և պահանջով, որ դադարեն սպառազինում մատակարարել Ադրբեջանին: Քանի որ գիտենք, որ իսրայելական անօդաչուները, հրթիռները գտնվում են Ադրբեջանի սպառազինության կազմում և կիրառվում են Արցախի խաղաղ բնակչության դեմ»,- գործակալությանը հայտնել է ակցիայի կազմակերպիչներից մեկը՝ Արմինա Խանյանը:
Երթին մասնակցող ավտոմեքենաները գունավորված են եղել հայկական դրոշի գույներով: Հանրահավաքին մասնակցում են Իսրայելի հայկական համայնքի անդամները:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 16-ի դրությամբ Արցախի զինուժը խոցել է հակառակորդի՝ 16 ուղղաթիռ, 21 ինքնաթիռ, 181 անօդաչու թռչող սարք, 552 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 5839 զոհ։ Հայկական կողմից, նախնական տվյալներով, կա 633 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 33 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։ Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախ։










