Մոտ 20 մեքենայից բաղկացած թուրքական ռազմական շարասյունը հատել է Սիրիայի սահմանը՝ ուղևորվելով Իդլիբ. SOHR

23:47 • 03.12.20

Մարդու իրավունքների սիրիական դիտորդական կենտրոնի (SOHR) ակտիվիստները հաղորդել են ռազմական նշանակության տեխնիկա տեղափոխող մոտ 20 տրասպորտային միջոցից բաղկացած թուրքական շարասյան մասին, որը նկատել են Սիրիայի տարածք մտնելիս:

Նրանց տվյալներով՝ շարասյունը դեկտեմբերի 3-ին՝ օրվա առաջին կեսին, Սիրիայի սահմանը հատել է «Քաֆր Լուսին» անցակետով՝ շարժվելով դեպի Իդլիբ: Մեքենաներն ուղևորվել են դեպի սիրիական նահանգի Ջաբալ ալ-Զավիա շրջանում տեղակայված թուրքական ռազմական դիտակետեր:

Բացի այդ, սիրիական դիտորդական կենտրոնի ակտիվիստները պարզել են, որ թուրքական զորքերը տեղակայվել են Հալեպ-Լաթաքիա միջազգային մայրուղու երկայնքով:

Թուրքիան շարունակում է զինվորական ուժեր ուղարկել Սիրիայի հյուսիսարևմտյան շրջան՝ Իդլիբի «ապա-էսկալացիոն գոտում» թուրքական զինուժի ներկայությունը հասցնելով 7545-ի: