Եգիպտոսի օդուժի Rafale կործանիչները Լիբիայի հետ սահմանին ոչնչացրել են ահաբեկչական խոշոր շարասյուն (տեսանյութ)

11:22 • 12.12.20

Եգիպտոսի պաշտպանության նախարարության տարածած հայտարարության մեջ ասվում է, որ իր ուժերը կանխարգելիչ հարված են հասցրել Լիբիայի հետ սահմանին գտնվող ահաբեկչական տարրերի դեմ, որի ընթացքում ոչնչացվել են ահաբեկիչներով, զենքով և զինամթերքով բեռնված 21 չորս անվահեծ մեքենա:

Այս մասին հայտնում է almasdarnews.com-ը՝ նշելով, որ գործողության մասին տեղեկատվությունը ստացվել է ՊՆ հայտարարության այն հատվածից, որտեղ մանրամասնվում են սեպտեմբերի 1-ից դեկտեմբերի 8-ը «պետության բոլոր ռազմավարական ուղղություններում ահաբեկչության դեմ պայքարի զինված ուժերի կողմից գրանցած հաջողությունները»։

Թվիթերյան միկրոբլոգում հրապարակված տեսանյութից պարզ է դառնում, որ ճշգրիտ օդային հարվածներ են հասցվել Եգիպտոսի ռազմաօդային ուժերի Rafale կործանիչներով, որոնք այս գործողությունում գլխավոր դերակատարում են ունեցել՝ թիրախավորելով և ոչնչացնելով Լիբիայի սահմանի մոտ գտնվող ավելի քան 20 մեքենա զենք ու զինամթերք պարունակող ահաբեկչական շարասյունը:

Գործողությանը մասնակցել են նաև Եգիպտոսի ռազմաօդային ուժերի հետախուզական ինքնաթիռները, որոնք վերահսկել են իրավիճակը։

Հատկանշական է նշել, որ ֆրանսիական արտադրության Rafale օդանավները կարող են կրել բարձր ճշգրտության զենքեր, այդ թվում`լազերային ղեկավարվող ռումբեր` 202-ից մինչև 910 կիլոգրամ, որոնք ունեն մինչև 18 կիլոմետր հեռահարություն, ինչպես նաև ES-30L ղեկավարվող հրթիռներ՝ մինչև 12 կիլոմետր հեռահարությամբ: