Մինսկում ձերբակալություններ են սկսվել տարբեր շրջաններում ընթացող բողոքի ցույցերի մասնակիցների շրջանում (տեսանյութ)

16:50 • 13.12.20

Մինսկում իրավապահ մարմինների աշխատակիցները ձերբակալություններ են իրականացնում կիրակնօրյա բողոքի ցույցի մասնակիցների շրջանում: Այս մասին տեղեկացնում է ТАСС գործակալությունը՝ հղում անելով բելառուսական աղբյուրին:

Հաղորդվում է, որ ուժայինները մի քանի մարդկանց են ձերբակալել տարբեր փողոցներում: ՕՄՕՆ-ի աշխատակիցներին տեղափոխող ավտոբուսներ են նկատվել բելառուսական մայրաքաղաքի տարբեր հատվածներում: Նրանք մարդկանց բերման են ենթարկում նաև բակերից, որտեղ փոքրաթիվ հավաքներ են կազմակերպվում:

Նշվում է, որ ցուցարարների՝ տասնյակից մինչև մի քանի հարյուրի հասնող շարասյուներ են երթ իրականացնում տարբեր թաղամասերի փողոցներում:  

Հիշեցնենք, որ ընդդիմության և նրանց կողմնակիցների բողոքի ցույցերը չեն դադարում օգոստոսի 9-ին երկրում կայացած նախագահական ընտրություններից հետո, որի արդյունքներով հաղթող էր ճանաչվել երկրի գործող նախագահ Ալեքսանդր Լուկաշենկոն: Քաղաքացիներն, ավանդաբար, մայրաքաղաքի տարբեր շրջաններում բողոքի ակցիաներ են իրականացնում կիրակի օրերին: