Times-ը տեղեկացրել է, որ նախքան Գերմանիա ուղարկվելը Նավալնիին 2-րդ անգամ թունավորելու փորձ է արվել

09:57 • 13.12.20

Բրիտանական Times թերթը, վկայակոչելով գերմանական հատուկ ծառայությունների իր անանուն աղբյուրներին, վստահեցնում է, որ ռուս ընդդիմադիր գործիչ Ալեքսեյ Նավալնիին Ռուսաստանում փորձել են թունավորել նաև երկրորդ անգամ, երբ նա արհեստական կոմայով պառկած է եղել Օմսկի հիանդանոցում:

Հոդվածը լույս է տեսել Նավալնիի հետ կապված միջադեպի հետաքննության հարցում ԳԴՀ-ի կողմից համագործակցությունը մերժելու մասին Ռուսաստանի նախագահ Վլադիմիր Պուտինի մանրամասն բացատրությունից մեկ օր անց, գրում է «ՌԻԱ Նովոստի» գործակալությունը:

«Անհաջող առաջին մահափորձից հետո, պետական անվտանգության կասկածյալ պաշտոնյաները փորձել են ավարտել սպանությունը ... թույնի երկրորդ չափաբաժնով, մինչև նա կտեղափոխվեր Բեռլին` անվտանգ վայր», - գրում է պարբերականը՝ չնշելով որևէ հատուկ կասկածյալ անձի կամ գերատեսչության:

Պարբերականի համաձայն, գերմանական հետախուզական ծառայությունների ներկայացուցիչները այս եզրակացություններով կիսվել են Մեծ Բրիտանիայում իրենց գործընկերների հետ: Վստահեցվում է, որ Նավալնուն փորձել են թունավորել, երբ պատրաստվում էին բժշկական ինքնաթիռով տեղափոխել նրան Գերմանիա: Այնուամենայնիվ, այս տեսության համար ապացույցներ չեն բերվում:

«Դա արվել է այն ակնկալիքով, որ նա (Նավալնին) Բեռլին հասնելու ժամանակ մահացած կլիներ», - մեջբերում է թերթը աղբյուրներից մեկին, որի անունը չի նշվում:

Ի պատասխան այդպիսի մեղադրանքների ՝ ՌԴ նախագահ Վլադիմիր Պուտինն արդեն հայտարարել է, որ եթե իշխանությունները ցանկանան ինչ-որ մեկին թունավորել, նրան դժվար թե ուղարկեն բուժման Գերմանիայում:

Նավալնիի ինքնազգացողությունը կտրուկ վատացել էր օգոստոսի 20-ին Տոմսկից Մոսկվա թռչելիս: Նրան տեղափոխող ինքնաթիռն արտակարգ վայրէջք էր կատարել Օմսկ քաղաքում, ուր նրան հոսպիտալացրել են շտապ օգնության թիվ մեկ հիվանդանոց: Հիվանդանոցի մասնագետները Նավալնիի օրգանիզմում թույնի հետքեր չէին հայտնաբերել: Ըստ նրանց՝ հետազոտությունները միայն ալկոհոլի և կոֆեինի հետքեր են ցույց տվել: Հայտնի է, որ չվերթից առաջ Նավալնին թեյ է ըմպել օդանավակայանի սրճարանում:

Օգոստոսի 22-ին Նավալնիին ինքնաթիռով տեղափոխել են Բեռլինի Charite հիվանդանոց, որի մասնագետներն ավելի ուշ հայտարարել էին վերջինիս թունավորման մասին, իսկ Գերմանիայի զինված ուժերի մասնագետները մաշկի, արյան և մեզի նմուշների մեջ «Նովիչոկ» խմբին պատկանող թունավոր նյութի հետքեր էին հայտնաբերել: