«Նիկո՛լ Փաշինյան, դու գումարի դիմաց ծախել ես հայրենիքը, դու չունես սրբություն, դու չունես հայրենիք». բողոքի ակցիա՝ Կառավարության դիմաց (տեսանյութ)

11:01 • 15.12.20

Մենք եկել ենք հարցնելու, Նիկոլ Փաշինյան, թե կարողացել ես գիշերը հանգիստ քնել վաճառած հայրենիքով, եղբայրների ուրացած արյունով և այսքան մարդու դավաճանած: Այս մասին Կառավարության դիմաց իրականացվող ակցիայի ժամանակ ասացին մասնակիցները` պահանջելով Նիկոլ Փաշինյանի հրաժարականը: 

«Նիկոլ Փաշինյան, դու գումարի դիմաց ծախել ես հայրենիքը, դու չունես սրբություն, դու չունես հայրենիք, դու ունես միայն շահ, որը գումարն է»,-ասաց մասնակիցներից մեկը և նշեց, որ մի քանի ժամից կբերեն դոլարները, որով ծախել է հայրենիքը:

Նրանք, դիմելով ոստիկաններին, նշեցին, որ սխալ մարդու են ոստիկանները պաշտպանում; «Մենք ցանկանում ենք նաև շնորհակալություն հայտնել Ռուսաստանի նախագահ Վլադիմիր Պուտինին, մարդու իրավունքների պաշտպան Արման Թաթոյանին, ով զբաղվեց գերիների հարցով՝ ի տարբերություն քեզ, ում հետաքրքրում է միայն փողը, ալկոհոլը և ՀՀ քաղաքացիներին միմյանց դեմ հանելը»,-ասաց ակցիայի մասնակիցներից մեկ ուրիշը և նշեց, որ Նիկոլ Փաշինյանը պատասխան է տալու բոլոր արարքների համար և ՀՀ պատմության ամենաամոթալի ղեկավարն է:

ԲՀԿ երիտասարդների միության նախագահ Աշոտ Անդրեասյանը նշեց, որ ժամը մեկին փոխանցելու են այն դոլարները, որոնցով ծախել է մեր հայրենիքը: «Մենք ակցիաներ ենք անելու այնքան ժամանակ, մինչև դավաճան վարչապետը ամբողջ թիմիով հրաժարական տա, դրանից հետո պահանջելու ենք պատասխանատվություն կրի օրենքի ողջ խստությամբ»,-ասաց նա: